4 ноябрьыште, Калыкын чак чумырген шогымо кечынже, Москваште Кузьма Минин ден Дмитрий Пожарскийлан памятник деке Россий президент Владимир Путин дене пырля пеледыш аршашым пыштыше делегацийыш Калык-влак кокласе кыл шотышто Россий президент пеленсе Федераций советын еҥже-влак кокла гыч кок еҥым, кок ӱдырамашым ойырен налыныт. Иктыже азербайджан-влакын ФНКА-штым вуйлатыше лийын, весыже – Лариса Яковлева. (Ушештарена: Лариса Яковлевам Марий-влакын федеральный национально-культурный автономийыштын председательже семын ты Советыш президент Владимир Путинын 2017 ий 18 июльысо указше дене пуртеныт — авт.) Тиде делегацийыште тӱрлӧ конфессий гыч, чылаже лу еҥ, лийыныт.
— Тиде памятникшат исторический, кечыжат – тыгаяк, сандене пеледыш аршашым пыштыше-влак коклаште лияш, тушто ойлаш – моткочак кугу чап. А ойлымо шуын шуко: Марий Эл нергенат, калык нергенат, иктаж йодышым пуашат кумыл лийын. Но ме кажныже ик шонымашым гына каласенна: пырля, ик командыште, ик Советыште пашам ыштена, сандене президентнам поддержатлена.
Умбакыже Кремльыште прием лийын. Советын еҥже семын тушко Лариса Николаевнамат ӱжыныт.
— Марий Элысе Общественный палатын председательже Владислав Максимович Зотин дене саламлалтынна да коктынат ты кечынак эше Марий Эл Республикнан шочмо кечыже манын ушештаренна, тиде пайрем денат саламленна.
Прием деч вара Кугыжаныш Кремль дворецыште концерт лийын. Тудым эртарыше «Мы едины» мер организаций чыла ФНКА вуйлатыше-влакым чумырен. Саламлыше коклаште Лариса Николаевнат лийын.
— Погынышо-влакым чыланат ик пайрем дене – Калыкын чак чумырген шогымо кечыж дене – саламленыт. А мый, сценыш лекмеке, эн ончычак таче эше Марий Элын шочмо кечыже манын каласышым да тидым уло зал совым рӱж кырен вашлие. Тугеже погынышо калык Марий Элым пайрем кечыж дене саламлен, лектеш. Тидым ужын, чонлан моткочак сайын чучын.
Палемдена, Калык-влак кокласе кыл шотышто Россий президент пеленсе советын Москваште эртыше кокымшо погынымаштыже тудын шым комиссийышкыже еҥ-влакым палемденыт. Лариса Яковлева самырык-влакым духовно-нравственный да патриотический шӱлышеш куштымо шотышто комиссийыш пуртеныт.
— Тиде пашам мый палем, молан манаш гын утларакше илышыштем лач тиде йодыш денак ыштенам. Санденак тудо чонемлан лишыл. Кузе пашам ышташ тӱҥалына – кызытеш каласен ом керт, вет комиссийын эше ик заседанийжат лийын огыл. Но ончыкыжым марий мер илыш дене кылдалтше икмыняр темлымашым каласаш шонем, — палдарыш Лариса Николаевна.
Любовь Камалетдинова.
