Йӱштӧ толмо дене еҥ-влак илыме верлаштышт коҥгашке чӱчкыдынрак олташ, ырыктыше электроприборым чӱкташ тӱҥалыт. Тыгодым нунын сайын пашам ыштымыштым моткочак тӱткын эскерыман манын Марий Элысе кугыжаныш противопожарный службын управленийже эше ик гана ушештара.
Республикысе правительстве шуко шочшан еш-влаклан полшаш тырша да пожар лӱдыкшыдымылык йодмашлан келшен толдымо электрооборудованийым, коҥгам, дымоходым тӧрлаташ да (але) автономный дымовой пожарный извещательым налаш окса роскотым пӧртылтымӧ радамым палемден. Ремонт пашалан да извещательым налаш лийше роскотым единовременный выплате семын пӧртылтат. Но ачалымылан ак 15000, налмылан 700 теҥге деч утларак лийшаш огыл.
Кодшо ийын республикысе олала ден районлаште илыше шагал огыл шуко шочшан еш тиде йӧн дене пайдаланен.
Выплатым тугай еш-влак налын кертыт, кудыштын среднедушевой доходышт Марий Элыште палемдыме илен лекташ кӱлшӧ эн изи кугыт деч шагал.
Оксам налаш ача-ава кокла гыч иктыже илыме вер шот дене муниципал образованийын администрацийышкыже йодмашым возышаш. Лӱмынак чумырымо комиссий сурт-оралтым ончен лектеш да ачалыме пашам эртараш кӱлмӧ нерген пунчалым луктеш.
Йодмаш пелен теве могай документ-влак лийшаш улыт:
— паспортын копийже,
— шуко шочшан еш улмо нерген удостоверений,
— ешыште мынярын улмо нерген справке але йодмашым возышо дене пырля илыше-влак да нунын икте-весышт дене родо улмым палдарыше вес документ,
— илыме верлан собственность права улмым пеҥгыдемдыше документ-влакын копийышт,
— илыме верыште регистрироватлалтме нерген документ-влакын копийышт,
— документ-влакым пуымо деч ончычсо кум тылзылан ешын парышыже нерген справке.
Ачалыме пашам эртарымеке але извещательым налмеке, калыкым социально обслуживатлыме рӱдерыш 2019 ий 1 декабрь марте мийыман да выплатым тӱлаш йодмашым возыман.
Налме извещательым йодмашым возышо еҥ шкеже шындышаш. Тидлан ышталтше роскотлан окса огеш пӧртылталт.
Л.КАМАЛЕТДИНОВА
