ЕШ ДА ИКШЫВЕ

Корнышто азам ышташ тӱҥалшылан полшеныт

Республикысе МВД-н кугыжаныш инспекций пашаеҥже-влакын кӱлеш полышым пуымыштлан кӧра ӱдырамашын азаже жапыштыже да тазалыклан эҥгек деч посна шочын.

МВД ГИБДД-н ДПС-шын отдельный спецбатальоныштыжо тыршыше Руслан Петров ден Юрий Михайлов 12 июньышто «Йошкар-Ола-Зеленодольск» кугорнышто службышто лийыныт. Икмыняр жап гыч нунын деке водитель лишемын да машинаштыже улшо мӱшкыран пелашыжын азам ышташ тӱҥалмыж нерген каласен. А вара, ӧрын шогыде, ватыжым Йошкар-Оласе роддомыш наҥгаен кодаш йодын. Молан манаш гын корнышто машина шуко кудалыштыт, сандене вараш кодаш лӱдын.

Полицейский-шамыч пӧръеҥлан полшаш да вате-марийым рӱдолашке наҥгаяш келшеныт. А тиде жапыште «вашкеполышыш» йыҥгыртеныт, мо, кузе улмым умылтареныт да ваштарешышт кудалыныт. Нунын дене олашке пурымаште ваш лийыныт. Тыге полицейский-шамыч вате-марийым «вашкеполыш» машинашке кусарен шынден колтеныт. Тылеч вара икмыняр жап гыч нунын ӱдырышт шочын.

Ава ден икшывым мӧҥгышкышт колтымо кечын республиканский перинатальный рӱдерыш Марий Элысе кугыжаныш автоинспекцийыште тыршыше да кӱлеш годым полышым пуышо пашаеҥ-влак ден МВД пеленысе Общественный советын еҥже миеныт. Нуно шуко шочшан Веденкинмыт ешым, Россий кечын шочшо Ева ӱдырыштым саламленыт да … йоча автокреслым пӧлекленыт!

— Пиалешна, корнышто ГИБДД пашаеҥ-шамычым вашлийынна. Нуно мыланна роддомыш жапыштыже миен шуаш полшеныт. Тиде нылымше икшывына гынат, садак тунам, аза шочаш тӱҥалмеке, мом ышташат ӧрынам, вет тыгай годым кажне минутшо шерге. Тыланда моткоч кугу тау! – куанен тауштен пиалан ача.

Л.КАМАЛЕТДИНОВА

Опубликовать в Одноклассники

Добавить комментарий