Йошкин кот
Корнет пиалан лийже, «Йошкин кот»
27 июньышто Юл кундемысе технологический университетын социальный технологий факультетше негызеш погымо «Йошкин кот» студотряд Ялта олашке каен.
Кумда элнан моло кундемлаж гычат Крымыш логал кертышт манын, Россий мучко 50 наре стройотряд коклаште Ялтышке логалаш конкурс эртен. «Йошкин кот», 22 регион гыч ойырен налме 23 студотряд радамыш логалын, тений кокымшо гана Крымыш каен. Сервисный отрядын боецше-влак кок тылзе жапыште «Ялта-интурист» унагудышто поварын полышкалышыжлан, грузчиклан, кухньысо пашаеҥлан монь тыршаш тӱҥалыт. 12 еҥан студотрядым Анна Блинова вуйлата, комиссарышт — Полина Сидоркина, а мастерышт — Полина Садовина.
Ӱдыр-рвезе-влакым тора корныш ужаташ ача-авашт веле огыл, республикысе студотряд-влак штабын командирже Аркадий Кожевниковат миен. Тудо ӱдыр-рвезе-влаклан, икте-весылан эҥертен, ваш полшен, мӱндыр корным эрташ да у пашаштышт лекше неллыкым сеҥен, республикын чапшым кӱшнӧ кучаш, паша кокла гыч Шем теҥыз серыште каналтен, вийым поген, сай-таза пӧртылаш тыланен.
Е.Садовин.
Снимкыште: тора корныш тарваныме деч ончыч А.Кожевников поро тыланымашым ойла.
М.Скобелевын фотожо.
