«Российский учебник» (ДРОФА‑ВЕНТАНА) корпораций «Особо охраняемые природные территории моего края» экологий маршрут-влак конкурсым увертарен.
Тудо 2018 ий 15 январь марте шуйна. Тушко кажне кумылан еҥ ушнен кертеш. Тидлан кугыжанышын аралтыме кумдыкышто лийман. Тиде заповедник, национальный ден пӱртӱс парк, кугыжаныш заказник, пӱртӱс памятник, тыгак дендрологий ден ботанический сад лийын кертыт. Молан нуно тыгай статусан улыт — научный, культурный, эстетический да тазалыкым пеҥгыдемдаш полшышо значенийыштым ончыктыман. Могай маршрут дене эртымым, могай ӧрыктарыше сӱретым, янлыкым, кушкылым ужымым возен колтыман. Ты але вес аралыме кумдык могай, кузе ышталтын, шӱкшак кышкыме урно, канаш шичме олымбал ситышын улмым палемдыман. Пӱртӱс кумдыкын ойыртемжым, кузе тудым эше саемдаш лиймым ешараш гын, эшеат сай лиеш. Кажне пашам аклыме годым участникын биологий да экологий шотышто шымлымашыже ден фотогорафий ситышын улмымат шотыш налыт.
Конкурсыш ушнаш шонышо-влак проектын сайтышыже регистрацийым эртышаш улыт. Йодмаш дене пырля участникын анкетшым возыман, маршрутым ончыктыман, фотографий-влакым пижыктыман. Текстыште эн шагалже 1500 знак лийшаш. Иктаж-могай социальный сетьыш ушныман да ойлымашлан репостшым ыштыман. Кум сеҥышылан диплом ден шергакан пӧлекым кучыктат. Чыла участниклан сертификат лиеш. Конкурсын сайтышын адресше.
С.Носова
