«Единый Россий» партийын ончылгоч йӱклымаштыже кандидат семын шуко у еҥ-влак улыт. Южо избирательный округышто конкурс тугай кугу – ик верыш 15 еҥ.
Ончылгоч йӱклымашке пуымо йодмаш-влакым шергал лекмеке, кызытеш ыштыме иктешлымаш почеш тыгай сӱрет палдырна: икымше гана кандидат-влак кокла гыч пелыже утла беспартийный улыт. Тушко ушнаш чылаже 7636 йодмашым пуэныт, палдарен ончылгоч йӱклымашын федеральный организационный комитетшын председательже сенатор Александр Карелин.
Ончылгоч йӱклымашын 35 % наре участникше – 35 ияш марте самырык еҥ-влак. А кандидат-шамычын кокла ийготышт – 41 ий.
– Йодмашым пуымо жапым ме кок арнялан шуенна, – палдарен Александр Карелин.
Процедурын кажне кумшо участникше – изи але кыдалаш бизнесын еҥже. Образований сфер гыч – 14,5 % кандидат, муниципальный служащий-влак 10 % нарын улыт. Тыгодым кажне нылымше гына – действующий манме депутат, да 4 % гына – Кугыжаныш Думын кызытсе созывшын депутатше. Кажне кумшо кандидат – пандемий дене кучедалмашке ушнышо волонтер.
Тыгак ончылгоч йӱклымашын историйыштыже икымше гана тушко «Союз добровольцев Донбасса» (СДД) ушемын еҥже-влак пурталтыныт. Тыгай йӧн партийын да ты ушемын ойпидышым ыштымыштлан кӧра лийын.
Александр Карелин палемден: ончылгоч йӱклымаш пӱтынь эл мучко икымше гана электронно эртаралтеш. Ойлымыж почеш, «шолыштмо» аккаунт-влак полшымо дене избиратель-шамычым регистрироватлен ончылгоч йӱклымашым дискредитироватлаш тӧчымашат лийын. Но тидым писын пален налыныт да кажне факт нерген партий правам аралыше органлашке увертарен.
Избиратель-шамычым регистрироватлымаш 28 май марте шуйна. А ончылгоч йӱклымаш 24 гыч 30 май марте эрта. Иктешлымашым 1 июньышто ыштат. Тылеч вара Кугыжаныш Думыш сайлымашке «Единый Россий» партийын кандидат-влак спискыжым Съезд пеҥгыдемда.
Марий Элыште праймеризыш ушнаш оргкомитет 35 кандидатурым регистрироватлен:
— 13 еҥ Кугыжаныш Думышко сайлымашке списке почеш ушнаш кумылым ончыктен;
— 7 еҥ одномандатник семын шкенжым темлен;
— 8 еҥ Кугыжаныш Погын гыч темлалтын;
— 7 еҥ – Йошкар-Оласе Депутат-влак Погынымаш гыч.
Любовь КАМАЛЕТДИНОВА
