17 майыште Йошкар-Олаште инвалид-влакын III всероссийский кеҥеж спартакиадыштын региональный этапше эртен.
Тушто шым район гыч 70 спортсмен вийжым терген. Участник-влак спортын кум видыштыже: куштылго атлетикыште, иймаште, ӱстембал теннисыште – таҥасеныт. Спортсмен-шамыч шагал улмылан кӧра, дзюдо дене турнирым эртарен огытыл. Такшым всероссийский спартакиадыште спортын шым видыштыже таҥасат. Тушко тыгак бочче, голбол, футбол пурат.
Ӱдыр-рвезе-влак коклаште, мутлан, ӱстембал теннисыште Анна Кропанева ден Кирилл Ласточкин (Медведево район), Дарья Подымникова ден Никита Гавриченко (Морко район), Надежда Махикова ден Егор Коновалов (Йошкар-Ола) икымше верым налыныт.
Сеҥыше ден призёр-влаклан «Дружба» стадионышто медаль ден Чап грамотым кучыктеныт. Нуным республикын сборный командышкыже чумырат.
Спартакиаде 12 июльышто тӱҥалеш. Йошкар-Олашке элнан тӱрлӧ кундемже гыч кок тӱжем наре спортсмен толшаш.
Е.ЭШКИНИНА.