Российын президентше В.Путинын кӱштымашыж почеш 2017 ийыште элым вуйлатышын фондшо гыч мемнан республиклан 42 миллион наре теҥге ешартыш окса ойыралтын.
Президентын фондшо гыч Шоя-Кузнецовысо психоневрологический интернатын малыме корпуслажым капитально олмыкташ 12 миллион теҥгем ойырымо нерген газетна увертарен ыле. Федеральный бюджет гыч ойырымо 30 миллион наре теҥгем тыгак Марий Элысе 20 общеобразовательный школ налеш.
Нунын коклаште улыт: Волжск оласе лицей ден А.С.Пушкин лӱмеш 9-ше №-ан школ, Волжский район Пӧтъял школ; Козьмодемьянск оласе лицей, Курыкмарий район Йоласал школ; Звенигово район Кокшайск селасе школ; Килемар район Арда школ; Кужэҥер район Токтайбеляк школ; Марий Турек район Карлыганысе К.А.Андреев лӱмеш да Хлебниково школ-влак; Медведевысе 3-шо №-ан да Цибикнурысо школ-влак; Моркысо 2-шо №-ан школ; У Торъял район Токтарсоласе Д.И.Онар лӱмеш школ; Оршанке район Нужавлак да Шулко школ-влак; Параньга район Мераҥсола школ; Шернур район Кукнур школ; Советский район Вечын школ; Юрино район Марьино школ.
Кугыжаныш вуйлатышын решенийже почеш, тиде кӱштымаш кузе шукталтмым Юл кундем федерал округын республикыште полномочный представительжылан терген шогаш пуымо.
А.АНДРЕЕВ.
