УВЕР ЙОГЫН

Кок пациентым мӧҥгӧ колтеныт

Марий Элын Тазалыкым аралыме министерствыжын увертарымыж почеш, таче, 11 апрельыште, Йошкар-Оласе больницын инфекционный отделенийже гыч у коронавирус инфекций деч эмлыме эше кок пациентым мӧҥгышкышт колтеныт.
Эрдене Йошкар-Оласе больницын инфекционный отделенийыштыже 77 пациент эмлалтын. Нунын кокла гыч 27 еҥ неле состоянийыште, 49 пациентын состоянийжым «нелылыкын кокла йыжыҥже» семын аклат, иктыным – «нелылыкын куштылго йыжыҥже» семын. Кок пациент шодым искусственно вентилироватлыме йӧн дене шӱла, 49 еҥлан кислород кӱлеш.
Йоча республиканский клинический больницыште кум икшыве кия. Нунын кокла гыч иктыжын у коронавирус инфекций дене черланымыжым официально пеҥгыдемдыме. Кок пациентын тазалыкшым «нелылыкын кокла йыжыҥже» семын аклат, икте шкенжым сайын шижеш.
Звенигово районысо рӱдӧ больницын коронавирус черан пациент-влаклан палемдалтше отделенийыштыже ик черле кия.
Медведево районысо рӱдӧ больницын коронавирус черан пациент-влаклан хирургический да акушерско-гинекологический профилян медицине полышым пуымо отделенийыштыже кок ӱдырамаш кия. Врач-влак нунын состоянийыштым «нелылыкын кокла йыжыҥже» семын аклат.

М.ИВАНОВА

Опубликовать в Одноклассники

Добавить комментарий