УВЕР ЙОГЫН

Рашемдаш, полшаш да палдараш

Нижегородский областьыште Юл кундем федеральный округлан Аутистический спектрын пужлымыж дене орланыше еҥ-влаклан социально полшымо ресурс рӱдерым почыныт.
17 мартыште РФ президентын Юл кундем федеральный округысо полномочный представительже Игорь Комаров регионым вуйлатыше Глеб Никитин дене пырля Нижегородский областьым социально вияҥдыме рӱдерыш миен коштын да тиде Ресурс рӱдерышкат пурен.
Тыште у методике да паша опыт дене ий еда 1000 наре еҥлан полшаш палемдыме, а аутистический спектрын пужлымыж дене орланыше еҥ-влак дене тӱрлӧ аланыште пашам ыштыше специалист-шамыч профессиональный компетенцийыштым нӧлтен кертыт.
Ресурс рӱдерын директоржо Алиса Бадьянова И.Комаровлан пашан тӱҥ направленийже да ик эн ончыч шукташ кӱлмӧ задачыже-влак нерген каласкален. Мутшо почеш, проект Ресурс рӱдерыште ментальный ситыдымашан айдемыланат, тудын ешыжланат кӱлешан инфраструктур улмо дене шергакан. Тыште чыла еш логопедын, дефектологын, психологын полышыштлан эҥертен, тыгак келшыше физкультур дене заниматлалтын кертеш.
Игорь Комаров диагност-влакын йоча-шамыч дене пашам ыштымыштым ончен, шун дене нерынчыме, сад-пакчам кучымо да кулинар мастерскойлаште лийын. А ача-ава-влак дене мутланымыж годым аутистический спектрын пужлымыж дене орланыше йоча-шамычлан веле огыл, нунын ешыштланат психологический полышым пуаш кӱлмым палемден. Тыгодым «Ментальный тазалык» округысо проектым илышыш пуртымаште Ресурс рӱдерын виян эҥертыш лиймыжлан ӱшанымыжым палемден.
Ушештарена, 2021 ий 26 февральыште И.Комаров «Ментальный тазалык» мер проектым илышыш пуртымо шотышто совещанийым эртарен. Проектыште Башкортостан ден Чуваш республик, Нижегородский, Пенза да Ульяновск область-шамыч участвоватлат. Задаче-влакымат шындыме, тиде – йочан аутистический спектрын пужлымыж дене орланымыжым тӱҥалтыш жапыштак рашемдыме системым ышташ, ментальный ситыдымашан тӱрлӧ ийготан еҥ-влаклан полшымо виян йӧн-шамычым погаш да нунын дене кумдан палдараш, ресурс рӱдерын пашажым социальный обслуживаний, шинчымашым пуымо, тазалыкым аралыме шотышто организоватлаш, аутистический спектрын пужлымыж дене орланыше еҥ-влаклан да нунын ешыштлан келшыше медицине да моло полышым пуаш, палемдыме еҥ тӱшка дене тӱрлӧ аланыште пашам ыштыше специалист-влакым туныкташ, аутизм нерген каласкалаш.

М.ИВАНОВА

Опубликовать в Одноклассники

Добавить комментарий