Роспотребнадзорын Марий Элысе виктемжын увертарымыж почеш, 9 апрельыште у коронавирус инфекций дене черланыме 41-ше случайым пеҥгыдемдыме.
Гигиене да эпидемиологий рӱдерын, СПИД-рӱдерын лабораторийлаштышт чылаже 6510 шымлымашым эртарыме.
Медицине велым 1019 еҥым, ты шотыштак у коронавирусан черле дене кылым кучышо 762 гражданым, эскерат. Нунын коклаште 4 йот граждан уло. Учёт гыч 1690 еҥым кораҥдыме.
Марий Элын Тазалыкым аралыме министерствыжын палемдымыж гыч, 9 апрель эрдене Йошкар-Оласе больницын инфекционный отделенийыштыже 54 пациент эмлалтын. У коронавирус инфекциян ик пациент колен. 15 черле неле состоянийыште, нунын кокла гыч кокытшо шодым искусственно вентилироватлыме йӧн дене гына шӱла. 25 пациентлан кислород кӱлеш. 38 черлын состоянийжым «нелылыкын кокла йыжыҥже» семын аклат, иктыным – «нелылыкын куштылго йыжыҥже» семын.
Республиканский йоча клинический больницыште ик йоча кия. Звенигово районысо рӱдӧ больницыште ончычсо семынак ик черле эмлалтеш. Пациент-шамыч шкеныштым сайын шижыт.
М.ИВАНОВА
