Марий Элын ончычсо вуйлатышыже Леонид Маркеловын делаже шотышто заседаний-влак Нижегородский районный судышто умбакыже шуйнат.
Кодшо кечылаште тиде суд тудын 2 миллиардат 200 миллион теҥгеаш погыжым парыш семын декларироватлыдымым рашемден да конфисковатлен, воза «Коммерсантъ» газет.
РФ-н Генеральный прокуратуржын искше почеш, Леонид Маркеловын ава лийшыжын, Татьяна Маркелован, подконтрольный манме компанийже-влакын погыштымат поген налыт да кугыжаныш парышыш колтат. Ответчик-шамыч судын иктешлымашыж дене огыт келше. Нуно ӱшандараш тыршат: республикын ончычсо вуйлатышыжын нине фирме дене нимогай кылжат уке. Икмыняр миллиард кугытан парыш илыме верым чоҥымашке пыштыме инвестицийлан кӧра чумырген. Сандене Л.Маркелов судын решенийжым келшен толдымылан шотла. Но тыгодым тудын да ава лийшыжын компанийже-влакын могай погыштым конфисковатлышаш нерген гына судья Антон Симагин кум шагат радамлен! Манаш веле! Тугеже нунын мыняр погышт уло?!. Мо оҥайже, тиде радам Генпрокуратурын исковой йодмашыж дене тӱрыс келшен толын.
Тыге кугыжаныш парышлан вер гыч верыш кусараш лийдыме чылаже 120 объект погым, 16 автомобильым, 3,3 тӱжем квадрат метр кумдыкыш чумыргышо мланде участке-шамычым да ужалыме рӱдерым, 10 тӱжем квадрат метр кумдыкан да 353 миллион наре теҥгеаш спортивно-тазаҥдарыме комплексым колташ решенийым луктыныт. Тыгак Леонид Маркеловын Йошкар-Олаште улшо кок пачерже ден офисшым поген налыт. Нунын кадастр акышт 22 миллион теҥгем эрта. Ончычсо вуйлатыше 1 миллион теҥгеаш Patek Philippe маркан шагатше да 8,5 миллион наре теҥгеже, 224 тӱжем долларже да 660 тӱжем евро оксаж деч посна кодеш.
Прокурор ден следователь-шамыч шергакан погылан шотлалтше 950 тӱрлӧ арвер ден ӱзгарым шотлен муыныт. Нунын акышт 30 миллион теҥгешке шуэш. Тиде радамыште 25 шӧртньӧ слитке, 15 кидшагат, шергакан окса (монеты), йошкар арака, юмоҥа, кӱмыж-совла коллекций-влак, пыстылан ручка, сӱрет-шамыч улыт.
- Тыгак тӱрлӧ банк счетлаште аралалтше чылаже 4,7 миллион кугыт теҥге оксажым, «Памашъяльский каменный карьер» ОАО-н 2910 именной акцийжым поген налыт. «Чукшинский карьер», «Кардинал», «Воскресенский парк», «Марийский цемент» да «Телекомпания 12 регион» ООО-м следствий Татьяна Маркелован подконтрольный манме компанийже-влаклан шотла да нунын погыштым кугыжанышын парышышкыже колташ пунчалыныт.
- Леонид Маркелов шергакан нине арвер ден ӱзгарым 2012 ий марте пӧлек шотеш кучыктеныт, а погынышо окса – тиде политикыш толмешкыже бизнес пашам шуктымо деч парыш манын умылтарен.
- 2012 ийыште ойырлымешкышт, Йошкар-Олаште чоҥымо пашалан Ирина пелашыже вуйын шоген. А вара компаний-влакым Татьяна Маркелова налын да бизнесым «Телекомпания 12 регион» ООО-н директоржо Наталья Кожанова дене пырля вияҥдаш тӱҥалын.
- Л.Маркеловын ойлымыж почеш, полышкалышыже-влаклан тудлан кондымо пӧлек-влакым налаш чарен. А Москваште улшо кок пачер ден Йошкар-Оласе ик пачер вуйлатышылан шогалмыж деч ончычак ача-аваж деч наследстве семын кодыныт, тыгак кредит дене налме.
- — Мый нимом коллекционироватлен да наледен омыл, республикын нужна бюджетше гычат шолышташ нимом лийын. Мыйын марте Марий Элын кугу парымже ыле. Вуйлатымем жапыште тудым чотак иземден кертме, — каласен Л.Маркелов.
- Тудын делаштыже ушештаралтше организаций-влакын еҥышт нунын пашашкышт Леонид Маркеловын ушнымыжым шӧрен ойленыт. Ончычсо вуйлатышын акцийже-влак ден погыжым поген налаш прокуратурын йодмашыже нине еҥым ӧрыктарен. Но, кок велжымат колыштмеке, суд прокуратурын йодмыжым шуктен. Ответчик-шамыч тидын дене огыт келше да пунчалым обжаловатлаш шонат.
- Ушештарена, Леонид Маркелов, «Телекомпания 12 регион» ООО-н генеральный директоржо Наталья Кожанова, республикын ончычсо ялозанлык министрже Ираида Долгушева кугу кугыт взяткым налмылан титаклалтыт да кызыт следственный изоляторышто шинчат.
Л.КАМАЛЕТДИНОВА
