УВЕР ЙОГЫН

Кинотеатрым телевизор алмаштен гын…

Интерактив, рашлык, чапле йӱк, але эфирный ТВ мом уым темла?
Коронавирусын пандемийжылан кӧра телевидений ден телевизорлан йодмаш палынак кугемын. 2020 ийын индеш тылзе жапыштыже Российыште 5,1 млн. телеприёмникым ужалыме. Тидыже ончылийысе деч 17 процентлан шукырак. А йодмаш, мутат уке, темлымашым шочыкта: эфирный телеканал-влак интерактивный йӧныштым кумдаҥдат, Москваште кӱкшӧ рашлыкан эксперимент шотан ТВ трансляций-влак эртат. У темлымашым аклашлан дециметровый антенне ден келшыше приставке гына кӱлыт.
Интерактив йӱкан лийын
Ончыкыжым телевиденийын кушмо драйверже интерактив лиеш. Эфир вещанийыште интерактив сервис-шамыч кумда полосан HbbTV телевиденийын технологийже дене вияҥыт. Тудо линейный телевидений ден интернетын пашаштым иктыш уша.
HbbTV-приложений – тиде телевизорлан келыштарыме справочный, мультимедийный да интерактивный контентан сайт. Телевизорым ончышо еҥ тудым экраныш пультын полшымыж дене луктын кертеш.
Технологий 37 элыште кучылталтеш. Российыште HbbTV-приложенийыш 2,2 млн. смарт телевизорым ушымо, сервис дене 6 млн. наре еҥ пайдалана.
РТРС HbbTV-функций дене вич телеканаллан («Первый канал», «Матч ТВ», СТС, ТНТ да НТВ) пайдаланаш йӧным ышта. Мутлан, «Первый канал» «Голос», «Кто хочет стать миллионером?», «Давай поженимся» шоум ончыктымыж годым интерактивлан лачшымак тудым кучылтеш, да телевизорым ончышо-влак шоун йӧратыме наставникшылан йӱкым пуэн кертыт. 2020 ийыште телеканал эфирыш эше игечым пуртен: тудын илыме кумдыкышто могайрак лийшашыжым радамынрак пален налаш манын, пультышто ОК кнопкым гына темдалман. НТВ телеканал гын «Россия рулит!», «Еда живая и мёртвая», «Чудо техники» передачылашкыже викторине ден йӱклымаш-шамычым пуртен.
Интерактиван программым ончашлан HbbTV-функцийым кучышо телевизор, тыгак Enthernet але Wi-Fi да дециметровый антенне кӱлыт.
Чылажат пеш чатка
Эфирный телевещанийын вияҥме вес йыжыҥже – мультиплекс-влакым кӱкшӧ рашлыкан форматыш (HD) кусарымаш. Россий президентын 2014 ий 11 августышто лукмо указше дене келшышын, тиде 2021 ийыште лийшаш.
Тенийысе март гыч РТРС цифровой телевиденийым эфирыште HD форматыште ончыкта. HD-мультиплексын сигналжым Останкино телебашне гыч Москваште да тудын кумдыкыштыжо 58 ТВК куча.
Сентябрьыште НТВ телеканал Москваште Опер да балет тӱнямбал фестивальын НD-трансляцийжым шуко каналан чапле йӱк дене Dolby Digital 5.1. форматыште эртарен – телевизорым ончышо шуко еҥлан мероприятийыште очно лиймыжла чучын.
НD-мультиплексым ончашлан кугу куатан HEVC кодекым кучышо телевизор кӱлеш. Вес йӧн – телевизорыш ушаш палемдалтше HEVC кодек ден DVB-T2 стандартым кучышо приставке.
Кызытеш чыла тиде опытым эртарыме трансляцийлан шотлалтеш, калыклан HD-вещанийыш ушнашлан HEVC кодекым кучышо телевизор дене кумдан пайдаланашыже кӱлеш. Кӱкшӧ рашлыкан телевиденийыш куснымо йодышат лишыл жапыште решитлалтшаш. Но эфирный «цифрын» стандартан рашлык форматысе качествыже кызытат HD-качестве деч нимынярат начар огыл.
Антенне дене сайрак
Цифровой телевиденийым ончашлан DVB-T2 стандартым кучышо телевизор але тыгай функциян приставке да дециметровый антенне кӱлыт. 20 каналым кучашлан кок тӱрлӧ антенне: логопериодический да «толкынан (волновой) канал» — утларак келшен толыт. Нуно коктынат дециметровый толкыным – 21-60 телеканалым (ТВК) – кучен кертыт. Мультиплекс-влакын икте-весе деч чот тора гыч пашам ыштымышт годым логопериодический антенным налаш шотлан толеш. Мутлан, икымше мультиплекс 24 телеканалыште транслироватлалтеш гын, кокымшо – 58 телеканалыште. ТВК-влак коклаште ойыртем 10-15 единице деч шуко огыл гын, лучо «толкынан канал» манме антенне дене пайдаланаш. (Мультиплекс-шамычын телеканалышт нерген регионысо ртрс.рф сайтыште пален налаш лиеш).
Антенным пӧрт ден пачерын ойыртемыштлан келшышым ойырен налаш кӱлеш. Тыгодым пӧртын чоткыдылыкшым, могай кундемыше верланымыжым, пачерын могай пачашыште улмыжым, телебашне ден пӧрт коклам шотыш налман.
Пӧлемысе антенне дене пӧртын телебашне деч тораште огыл, вич километр коклаште, верланымыж годым пайдаланаш шотлан толеш. Уремыш (мутлан, пӧрт ӱмбалан, балконыш, окна рамыш але зданийын тӱжвал вел ужашышкыже) шындыме пассивный манме антене эн сайын пашам ыштышылан шотлалтеш. Чолга (усилителян) антенне телебашне деч 80 километр марте тораште илыме годым кӱлеш лиеш.

М.ИВАНОВА

Опубликовать в Одноклассники

Добавить комментарий