Эртыше кечылаште кундемыштына илыше да сай пашашт дене ойыртемалтше ятыр еҥым Марий Элым вуйлатыше А.Евстифеевын указше почеш тӱрлӧ кӱкшытан чап лӱм дене палемденыт. Кажныже республикынам вияҥдымашке шке надыржым пыштен да пышта, кажныжын лӱмжӧ мыланна палыме. Таклан огыл калыкмут ӱшандара: «Айдемым паша чапландра».
Но республикыште еҥ-влакым чапландрымашке ик у вашталтыш пурталтын. Ынде мемнан денат «калык мастар-влакым» палемдаш тӱҥалыныт. «Марий Эл Республик традиционный художественный промысел ден ремеслон калык мастарже» чап лӱмым кок еҥ налын: Оршанке районысо Ремесло пӧртым вуйлатыше кидмастар Виталий Кудрявцев да Йошкар-Ола гыч тӱрызӧ Ираида Степанова. Нуно коктынат эше регионысо кидмастар-влакым ушышо мер организацийым вуйлатат: икымшыже — «Пу вийым», весыже — «Марий тӱр рӱдерым». Тиде чап лӱмым сулен налмышт дене ме нуным шокшын саламлена. Тыгай званий дене Российысе моло регионышто шукертак палемдат. Мемнан дене тидыже Виталий Кудрявцевын тыршымыжлан кӧрак илышыш пурен.
С.НОСОВА
