КИДМАСТАР

АИСТЛАНАТ ПЫЖАШЫМ ЫШТЕН

Паша гутлаште яра жапым кажныже шонымыж семын эртара. Мутлан ӱдырамаш-влак пӧрткӧргым эрыктат, мушкыт, шымартат, тӱрлат, пидыт, а пӧръен-шамыч шукыж годым, эҥерым кидыш налын, колым кучаш лектын каят. Коклаште плотник пашам йӧратыше-влакат вашлиялтыт. А теве Волжский районысо Учимсола ял гыч Вадим Юрков, ӱяҥге воштырым тодын,  тӱрлӧ арверым ышта.

— Эше школышкат коштын омыл, изам пеленже коремыш воштырым погаш наҥгая ыле, — ойла Вадим Николаевич. — Шуко-шуко поген ситарымеке, пашалан пижын, а мый тудым онченам, полышкаленам. Тыгак тиде сомыллан мыят шӱмаҥынам.

Но чылт кыртменже тыгай пашам В.Юрков иктаж 25 ий ышта. Моло мастар еҥ-влак семын ӱяҥге воштырым тудо огеш шӱмлӧ, тыгак тодеш. Арвержым лак дене огеш чиялте, сандене тудо свежа пушеҥге пушанак кодеш.

— Экологий могырым ончалаш гын, яндар улыт, — воштылеш кидмастар. — А лак дене, мутлан, корзиҥгам чиялтена да тушко иктаж кочкыш йӧрварым пыштена гын, тушко лак пуш шыҥа.

Кидмастарын корзиҥгажым ялыште илыше-шамычат, фермер озанлыкым кучышо-влакат йодын толыт. Икымшышт пареҥге погымо годым, а молышт озанлык кӧргыштӧ тӱрлӧ куштырам, пилашӱкым да молымат нумалаш кучылтыт.

Тиддеч посна Вадим Николаевич деч пырысигылан «пӧртымат», канен кияшыже арверымат йодыт. А кидмастар йодмыштым тыманмеш шукта.

— Икияш воштырым шыжым, лум вочмо деч ончыч, поген кодаш тыршем, — рашемда марий пӧръеҥ. — Уке гын телым йокрок. Кидпашам ыштен, чонем кана, жап писынрак эртымыла чучеш.

В.Юрков Яльчикысе спорт лагерьыште ороллан ышта, кидпашалан жапше ситышынак уло. А теле гоч пидме корзиҥгаже-влакым кеҥежым канаш толшо-влаклан ужала.

— А канаш толшыжо кушечын гына огытыл?!  Корзиҥгам ынде Россий мучко шуко олаш наҥгаеныт. Украинышкат шуын. Теве, мутлан, Крым гыч толшо аистлан пыжашым йодын ыле. Ӧрын-ӧрынак ыштенам. Йошкар-Ола гыч шепкам йодын толшымат сайынак шарнем, — палдара поро кумылан кидмастар. — Воштыр гыч пеш шуко арверым тодаш лиеш. Уныкам интернетыште мом да кузе ыштышашым кычал луктеш да мылам ончыкта. Южгунамже уым шонен лукташ келша. Самырыкем годым чотрак кертам ыле. Ийгот эртыме дене парнямат лывырге огылла чучеш, сандене изирак арверым ыштылаш неле, но садак толашем.

Вадим Николаевич ыштыме пашажлан пеш шерге акым огеш йод. Ик корзиҥгажым 400 наре теҥгелан ужала.

Воштырым тодын ыштыме сомыл куштылгыжак огыл, шуко чытышым йодеш. Туге гынат марий пӧръеҥ кече еда тырша, калыкын веле огыл, а чон йодмо пашажым шукта.

Алевтина Байкова

Авторын фотожо

Опубликовать в Одноклассники

Добавить комментарий