Айдемылан эҥгекым ыштен кертше осал урлык пий-влаклан нерлыкым чиктен уремыш лукмо шотышто Россий Правительстве пунчалым лукмо гыч шоктыш. Вара могай урлыкым тиде спискыш пуртеныт, палыме шуэш ыле.
К.Прозорова.
Йошкар-Ола.
Чынак, 29 июльышто Россий Правительтсве айдемын тазалыкшылан да илышыжлан лӱдыкшым ыштен кертше пий урлык-влакын спискыштым пеҥгыдемден. Тиде списке ты шотышто федерал законын ужашыже манашат лиеш. Законжо 2020 ий 1 январь гыч илышыш пура. Тыгай пий-влакым нерлык да поводок деч посна уремыш лукташ ок лий. Оза шкенжын авырен налме участкыштыже гына тудым яраш колтен кертеш. Туге гынат капкаш пурымаштыже осал пий шогымым шижтарыше табличке лийшаш.
Тиде закон дене пеҥгыдемдыме чаракым чыла вере шотыш налшаш улыт.
Спискыш 12 урлык пурталтын: акбаш, американ бандог, амбульдог, бразильский бульдог, булли кутта, чистокровный алапахский бульдог (отто), бэндог, пире-пий гибрид-влак (волкособ), гуль дог, питбульмастиф, северокавказ пий да тудын метисше-влак.
Кеч ончычшо МВД спискыш пуртышашлык 69 урлык пийым палемден улмаш. Но тудо темлымаш кугу ӱчашымашым тарватен, сандене спискым угыч ончен лектыныт. Российысе кинологический организаций-влакын ушемыштат шке темлымашыжым ыштен, йот элласе опытымат шотыш налыныт.
Законым пудыртымылан административный штрафым пуаш тӱҥалыт. Но тудын кугытшо кажне регионышто ойыртемалт кертеш.
С.НОСОВА.
