Апрельыште пенсийым кӱзыктымӧ нерген ойлат. Кӧмытлан да мынярлан?
А.Топоров.
У Торъял район.
Йодышлан Россий Пенсий фондын Марий Элысе пӧлкажын пресс-службыштыжо тыге вашештышт:
– 1 апрель гыч кугыжаныш ден социальный пенсийым кок процентлан индексироватлат.
Тидын дене келшышын, Марий Элыште 17677 пенсионерын пенсийжым кӱзыктат.
Пенсийым элысе пенсионерын илен лекташ лийме эн изи кугытшын кӱзымыж дене келшышын нӧлталме. Ӱмаште тудо 1,02 процент лийын.
Индексаций деч вара Марий Элыште социальный пенсий кокла шот дене 8554 теҥге лиеш, инвалид йоча ден шочынак I группо инвалид-влакын пенсийышт – 12681 теҥге, а ача-ава деч посна кодшо 18 ияш марте икшыве-шамычын пенсийышт – 10568 теҥге.
Закон почеш кокымшо пенсийым налше-влакынат пенсийышт кӱза. Тиде тӱшкашке военный травмым налше инвалид, Кугу Отечественный сарын участникше, военнослужащий-шамычын тулык ватышт, ача-авашт да «Жителю блокадного Ленинграда» знак дене палемдалтше граждан-влак пурат.
М.ИВАНОВА
