Республикысе йоча лагерьлашке путёвко мыняр шога?
И.Петрова.
Йошкар-Ола.
Йодышлан Марий Эл Республикын Образований да науко министерствыштыже тыге вашештеныт:
– Кеҥежым пашам ыштыше 193 йоча организаций – кажныже тӱрлӧ. Кечывалым лийман 21 кечаш лагерьыш коштмылан 1596 теҥге кӱлын. Июньышто тушто 11 тӱжем наре йоча канен. Ола деч ӧрдыжсӧ лагерьлаш 21 кечаш сменылан путёвко кокла шот дене 22 000 теҥге шога. Ак тыгак сменын кужытшо да пагыт дене чак кылдалтын. Профильный манме смене 10 кече гына шуйна.
Тачысе саманыште ола деч ӧрдыжсӧ лагерь-влак школла дене пеҥгыде кылым кучат: ойпидыш негызеш икте-весе дене сеть программым ыштат. Тыге лагерь-влак путёвкылан акым волтат.
Мутлан, «Кооператор» лагерь 29-ше №-ан школ да 11-ше №-ан лицей дене ынде мынярымше ий келшен пашам ышта. «Каменная речка» ден В.Дубинин лӱмеш лагерь-шамычат оласе икмыняр школ дене пеҥгыде кылым кучат.
Тиде паша январьыштак тӱҥалеш.
М.ИВАНОВА.
