Мыйын илыме пӧрт воктене кевыт уло. Тушто пашам ыштыше-влак эре тамакым шупшаш лектыт, сандене кокымшо пачашысе пачерышкем уда пуш пура. Мом ышташ, кушко вуйым шияш, ала каҥашым пуэда ыле?
Н.Семенова.
Медведево посёлко.
Йодышлан Медведево районысо прокурорын полышкалышыже, юстицийын изирак советникше В.В.Поялков вашештен:
— «Тамак шикш деч граждан-влакын тазалыкыштым аралыме да тамак шупшмо деч эҥгек ышталтме нерген» федеральный закон дене келшышын торговльын услугыжым пуымо пӧлемлаште тамакым шупшаш чарыме. Законын 10-шо статьяж дене келышышын, индивидуальный предприниматель да юридический лица-влак шке пашаштым шуктымо пӧлемлаште да кумдыкышто тамакым шупшаш чарышаш улыт. Тыгак тамак шикш деч граждан-влакын тазалыкыштым аралыме нормым эскераш палемдыме. Тамак шикш тендам тургыжландара гын, кевыт вуйлатыше деке лекман. Нуно сатучо-влаклан тамакым шупшаш лӱмын верым палемдышаш улыт. Тыгай вержым кевытыш пураш ыштыме тошкалтышыште палемдыме гын, те тудым вашталташ йодын кертыда. Тамак шупшаш чарыме кумдык, пӧлем, объектлаште тидын нерген шижтарыше лӱмын посна пале лийшаш. Тидын шотышто РФ Здравоохранений министерствын приказыштыже ончыкталтын.
Тамакым шупшаш чарыме правилым пудртымылан граждан-влаклан административный штрафым пуэн кертыт. Тидлан элкӧрго орган-влак мутым кучат. Тидын шотыштак индивидуальный предприниматель але юридический лица-влакым законым пудртымыштлан тыгак административно мут кучаш шогалтен кертыт.
С.Носова.
