Республикыштына 26 ноябрь гыч 10 декабрь йотке Инвалидын тӱнямбал кечыжлан пӧлеклалтше «Мыйын изи тӱням» поро кумыл акций эрта. Тудым Йошкар-Ола мэрын стипендиатше-влак организоватленыт.
Студент-шамыч модышым, канцелярский сатум да оксам погеныт. Чумырымо средства дене шкет инвалид ден тазалыкыште экшык улман, тыгак тулык, начар ешыште кушшо йоча-влаклан пӧлекым налыт.
Акций кышкарыште активист-шамыч реабилитироватлыме рӱдерлашке, йоча ден подростко-влаклан палемдалтше интернатлашке лектыт, кумылым нӧлтышӧ тӱрлӧ мероприятийым эртарат, концертым ончыктат.
Акцийын цельже – поро кумылын шонымашыжым, акшым да практикыжым кумдан ончыкташ, самырык тукымым социальный практикыш ушаш, социальный проблемым пырля каҥашаш туныкташ.
М.ИВАНОВА.
