Марий Тиште кечын М.Шкетан лӱмеш Марий кугыжаныш национальный театрын фойештыже Российысе сӱретче ушемын еҥже, «Марий Эл Республикын самырык талантше-влак» кугыжаныш премийын лауреатше, Олык Ипай лӱмеш молодежный кугыжаныш премийын лауруатше, сӱретче Мария Клюкинан «Марий йомак тӱня» ончерже почылтын.
Тушто тудын марий калык йомаклан, мурылан, «Кече-Солнышко» йоча журналлан сӱретлыме пашаже-влакым вераҥдыме. Персонаж-влакын чиемыштат марий шӱлышан, тӱрлӧ орнаментымат ятыр вере ужын кертына. Ончерын презентацийжым сӱретче шкежак эртарен. Кумылым нӧлтышӧ, «куштылго» ончер лектын, манаш лиеш. Чыла пашажат акварель дене сӱретлалтын.
Мария Йошкар-Олаште шочын-кушкын. Ачажат – Ю.П.Клюкин – туныктышо, Марий Эллын сулло сӱретчыже. Ӱдыржӧ Йошкар-Оласе художественный училище деч вара Москосо кугыжаныш педагогический университетын художественно-графический факультетшым тунем лектын. Варажым тудат студент-влакым Н.К.Крупская лӱмеш пединиститутышто, марий кугыжаныш университетыште изобразительный исскуствылан кумылаҥден. «Кече – Солнышко» журналын художественный редакторжо лийын. Сандене ты савыктышлан пӧлеклыме пашаже ятыр погынен. Сӱретче тӱрлӧ кӱкшытан конкурсыш ушнен, ятыр сеҥымашке шуын. Чылаже 21 персональный ончерже эртаралтын. 100 наре книгалан иллюстрацийым сӱретлен. Тудын сылнештарыме книга-влак Йошкар-Олаште веле огыл, Москваште, Санкт-Петербургышто, Казахстаныште лектыныт. Шке творчествыштыже тудо кугу верым марий калыкын тӱвыражым, фольклоржым ончыктымылан ойыра, Марий книга савыктыш, Российысе писатель-влак ушемын республикысе пӧлкаж дене пеҥгыде кылым куча. Санденак писатель ден поэт-влак книгаштым сӧрастараш йодмаш дене чӱчкыдын лектыт.
А пытартыш ончержым М.Клюкиналан эртараш республикысе Марий тӱвыра рӱдер полшен.
С.НОСОВА
М.Скобелевын фотожо
