Йошкар-Олаште верланыше «Йошкин пырыс» памятникын копийжым Симферополь олаште вераҥдат.
Тиде 3 июньышто лиеш. Тунам Крымыште Симферополь олан кечыжым палемдаш тӱҥалыт. Памятникын копийжым почмашке Йошкар-Олан делегацийже кайышаш. Каласен кодыман, шукерте огыл Йошкар-Ола Российыште эн ойртемалтше каныме вер-влакым рашемдыше топыш пурен. Самырык-влакын пашашт, спорт да туризм министерствым вуйлатыше Лидия Батюкован палемдымыже почеш, марий олаштына ойыртемалтше архитектур объект ден памятник-влак ситышын улыт. Тидлан кӧрак йот кундемла гыч шуко турист толын кая.
А таче, 18 майыште, Тоштер-влакын тӱнямбал кечышт годым, Юрино районысо Шереметьев замкыште эсогыл «Почмо омса кече» эрта. Тушко кумылан кажне еҥ миен кертеш. Кастене замкын камин залыштыже тематический кас эрта.
С.Носова.
