5-6 ноябрьыште Йошкар-Олаште, Россий Армийын тӱвыра полатыштыже, икымше гана «Российын шӱдыржӧ» патриот муро межрегиональный фестиваль- конкурс эртен.
Вокальный мастарлыкым 100 наре мурызо, коллектив ончыктен. Нуно Марий Эл гыч веле огыл, Татарстан, Чуваший республикыла, Киров область гыч лийыныт. Фестивальым верысе ракетный дивизийын военный окестрже почын. Конкурс икымше кечын кечывалым эртен гын, кокымшо кечын кастенже сеҥыше-влакын гала-концертышт лийын.
Тӱвыра полатын пашаеҥже-влак тыгай меропритяийым эртараш шукертак шоненыт. Темлымаш дене Йошкар-Ола администрацийыш лектыныт. Чыла конкурсант-влак тауштымашан серышым, грамотым, тӱрло степенян дипломым налыныт. Мутлан, Оршанке районысо «Шонанпыл» фольклор ансамбльын йоча вокальный ансамбльже Р.Кудрявцева ден Е. Рыбакован «Нигӧ ок мондалт, нимо ок мондалт» марла йонгалтарыме мурышт дене кокнкурсын икымше степенян лауреатше лийыныт. Ансамбльын солистше Даниил Кудрявцев соло номинацийыште гын, 11-14 ияш-влак коклаште кумшо степенян лаурет лӱмым сеҥен налын.
