У ий салам: Шернур
Тений шӧрым мыняр перерабатыватлыме шот дене палынак ончыко тошкалме. Но тӱня илыш пӱсеммылан кӧра февраль-мартыште закуп ак 30 наре процентлан кугемме дене нелылыкат лекте, налше дене кыл лушкыш. Сандене продукцийнан шке акшым да йӧннам пужен ончалаш логале. Сатулан акым нӧлталме олмеш продукцийым утларак ямдылаш тӱҥална. Заводышто шӧр налме отделенийым чоҥаш пижна. Каза шӧр гыч косметикым ямдылыме цехым, торык гыч пелефабрикатым (вареник ден сырникым) ыштыме производствым пашаш колтышна. Москвасе «Шӧртньӧ шыже» выставкыште ныл шӧртньӧ да ик бронзо медальым налмына у жапыште пашам чын виктарен колтымынам ончыктыш.
Шушаш ийыште у цехлам почаш, шӧрым кече еда 20 тоннлан шукырак налаш да перерабатыватлаш шонена. Тидлан кугу инвестицийым пышташ логалеш. Но тыршымына арам ок лий – у шӧр продукцийым да кондитер изделийым ыштен луктына. Тидыже паша лектышнам 48 процентлан кугемдаш йӧным пуа.
У ийыште чылалан тыныслыкым, порылыкым да, мутат уке, тазалыкым тыланем. Кызытсе илышым ме айдеме семын умылен вашлийшаш, чын верч шогымына шукталтше манын шонышаш да тыршышаш, тыгодымак поро кодшаш улына. Чылалан пиал лийже!
С.И.ЧЕРНЫХ,
«Шернур сырзавод» ЗАО-н директоржо
