СПОРТ

Йошкар-Оласе «Дружба» стадионышто спортым йӧратыше-влак чумырегеныт

21 апрельыште Йошкар-Оласе «Дружба» стадионын чыла площадкыштыже могай-гынат мероприятий, мастер-класс эртаралтыныт. 

Стадионышто фитнес-аэробика, стретчинг дене мастер-классым ончыктеныт, тӱрлӧ конкурсым эртареныт. Уна, ӱдыр-рвезе-влак чыла вере кумылын ушненыт.

Кеч куштылго атлетике дене тургымым 18 апрельыште «Арена» манежыште почыныт, но тиде стартым уремыште куржталмылан тӱҥалтышым ыштыме семынат, палемдаш лиеш. «Формат Марий Эл» стартыш тӱжем утла кумылан еҥ лектын. Куандара: ты гана тазалык корныш школышто тунемше-влак ятырын ушненыт. Эсогыл кажнылан номер ситен огыл.

Участник-шамычым саламлаш самырык-влакын политикышт, спорт да туризм министр Л.Батюкова, фигурный мунчалтымаш дене Олимпийский модмашын Сочисе (2014 ий), Пхёнчханысе ший призёр Д.Соловьёв, Марий Эл фитнес-аэробике Федераций вуйлатыше С.Лебедева, «FORMAT MARI EL» мероприятийын организаторжо-влак толыныт.

Спорт мероприятий, чынжымак, сай кӱкшытыштӧ эртен.

Палемдыме 5 километрым (ончылгоч маршрутым ямдыленыт) чылан куржын эртеныт. Тидлан ты жапыште шошо игечыжат сай шӱкалтышым ыштен: лай мардеж вӱчкалтен, пуалын, канде кава гыч чевер кече шыратен ырыктен, весела кумылым пуртен. Оҥай, но спорт пайрем пытымеке, пуйто кава шӱтлен: чарныде йӱр йӱрын.

Пӧръеҥ-влак коклаште икымше верым Олег Манасов, кокымшым Николай Зайков, кумшо верым Константин Чекалкин налыныт. ™дырамаш-влак коклаште эн ончыко Мария Танатарова лектын. Маша Макарова ший призёр, Ксения Мубаракшина кумшо лийыныт.

– Мыланем чылажат келшен. Куржаш куштылго ыле. Участник-влак шукын толыныт, стартышкат ятырынак лектыныт. Тренировкыш коштам, – шыргажалын мане икымше верым налше О.Манасов.

– Ончыко лекташ мыланем тренировко ситен огыл. Пашам ыштем, сандене шонымо да кӱлеш семын ямдылалташ жап ок сите. Но ешем дене паша деч вара кажне кечын уремыш куржталаш лекташ тыршена. Ныл ияш ӱдырнат почешна куржталеш, – ойла Волжский район гыч толшо, ший призёр Н.Зайков.

– Игече келшен. Сай результатым ончыкташ тренировкылан шонымо семын жапым муаш ок лий, но тыршем. Тунемаш, пашам ышташ кӱлеш. Мыланем ече дене мунчалташ чотрак келша, но куштылго атлетике дене тургым тӱҥалын, куржталашат кӱлеш. Тидыже чылалан пайдале, шонем, – манеш М.Макарова.

Уна да организатор-влак журналист-шамыч денат вашлийын кутыраш жапым ойыреныт. Тушто тиде мероприятий нерген, тудым ончыкыжымат вияҥдыме нерген кутыреныт. Тыге ты спорт пайремым теле тургымым петырыме да куштылго атлетике тургымым почмо семын палемденыт. Молан теле тургымым петырыме? Лач ты кечын ий полатыште Д.Соловьёв фигурный мунчалтымаш дене мастер-классым ончыктен. А тудым тиде вид дене спорт школын верысе воспитанникше-влак куанен, тургыжланен вученыт, эсогыл пӧлекым ямдыленыт.

– Эре ий ӱмбалне веле огыл, уремыштат куржталам, упражненийым ыштем. Тидыже – шкешотан аэробный тренировко. Вет аэробный (яндар южым шӱлен) нагрузко шодо чер деч кораҥаш полша, шӱлаш ласкарак лиеш. Кӧргӧ орган кислород дене пойдаралтеш. Тидын деч посна ок лий. Шкенжым пагалыше, йӧратыше, тазалыкым пеҥгыдемдаш шонышо кажне айдеме куржталшаш, уремыштат тренировкым эртарышаш, – мане Дмитрий Соловьёв.

Е.Эшкинина.
М.Скобелевын фотожо.

Опубликовать в Одноклассники

Добавить комментарий