Йошкар-Олаште икшыве-влаклан йочасадлаште верым ситарыме йодыш пӱсын шога.
Тений улшо йочасадлаште верым ешараш йӧным мумылан кӧра 460 икшывым вераҥдыме. Туге гынат тачысе кечылан кум ийым темыше 475 ньогалан вер ок сите. Тидыже йоча шуко шочмылан да миграцийлан кӧра лийын. Рӱдоласе образований управлений школыш каяш шудымо икшыве-влаклан верым муашак тырша. Оласе власть 1990-шо ийла мучаште да 2000-шӧ ийла тӱҥалтыште поген налме йочасад зданийлам пӧртылташ палемден.
Мутлан, Йошкар-Оласе Кремлевский уремеш верланыше пашавер рӱдер икмыняр ий ончыч йочасад зданиеш верланен. Учрежденийлан вес зданийыш, Машиностроитель уремысе 6б адрес дене верланыше социальный обеспечений рӱдерын комплексный рӱдерышкыже, куснаш кӱштымӧ. Тудыжат йочасад зданийыште верланен. Кремлевский уремысе ончычсо йочасад зданийым олмыктымеке, тушан 150 икшывым вераҥдаш лиеш.
А.АНДРЕЕВ.
