Кугече пайремлан чиялтыме муно дене мом ыштыман?
А.Николаева
Медведево район.
Республикысе Юмыйӱла ушемын тӱҥ онаеҥже Александр Таныгинын ойлымыж почеш, кодшо ийысе Кугече деч вара аралыме муным кушко лиеш, тушко кышкаш огеш лий. Тудым Кугече кечын йӱлатыман. Олаште илыше-влакын тыгай йӧнышт уке гын, тидым ышташ родо-тукымыштлан ялыш намиен пуышаш улыт. Юмылтымо моло кочкышымат кышкаш, пийлан пукшаш ок йӧрӧ.
Православий йӱлам кучышо-влакланат тидым шотыш налман. Марий епархийын пресс-секретарьже Сергей Скорикын умылтарымыж почеш, муным черкыште освятитлыме гын, тудым тыгак йӱлатыман. Тыге ышташ йӧн уке годым тудым черкыш йӱлаташ намиен пуыман. Тыгай йӧнжат уке гын, муным мландыш ураш лиеш. Но урымо вержым тугайым ойырен налман, еҥ-влак тошкен ынышт кошт. Иктым шарныман: чиялтыме Кугече муно — тиде святыне. Чиялтыме муно утен кодеш гын, тӱнен илыше-шамычланат пуаш лиеш.
С.Носова
