9 мартыште, шуматкечын, самырык-влак Шернур ЗАГС пӧлкаште мужыраҥмыштым регистрироватлаш шоненыт, но тӧнежын пашаеҥже-шамыч, каныш кече манын, тиде пашам шукташ тореш лийыч. Палынем ыле, мужыраҥмым республикысе моло ЗАГС пӧлкаштат шуматкечын огыт регистрироватле мо?
Н.Петрова.
Шернур район.
Марий Элыште гражданский состояний актым возышо 16 пӧлка уло. gogov.ru сайтыште ончыктымо почеш, У Торъял, Марий Турек, Кужэҥер, Килемар, Курыкмарий ЗАГС пӧлка-влак шочмо гыч шуматкече марте пашам ыштат, моло – шочмо гыч кугарня марте.
Но, мутлан, Морко ЗАГС пӧлка шуматкечын официально кана гынат, йодмо почеш мужыраҥмым регистрироватла. Медведево ЗАГС пӧлка гын мужыраҥме деч посна эше шочмо, колымо нерген свидетельстве-влакым пуа. Тиде радамыш моло тӧнежымат пурташ лиеш, но… Шернур ЗАГС пӧлкан ик пашаеҥжын (фамилийжым каласаш ыш кӱштӧ) мутшо почеш, нуно официальный график почеш пашам ыштат, икманаш, шуматкече-рушарнян канат, чот кӱлеш гын веле лектыт, а мужыраҥмым лачшымак шуматкечын регистрироватлаш кӱлын гын, йодмашым вес вере пуэн кертыныт.
М.ИВАНОВА
