КАЛАСЕ, "МАРИЙ ЭЛ"

Невролог деке – терапевт гоч

Молан аҥысыр специализациян врач-влак деке участковый врач гоч возалтман?

Е.ИВАНОВА

Йошкар-Ола

 

Йодышлан Марий Эл Тазалык аралтыш министерствын эмлыме-профилактике полыш да лицензирований пӧлкажын советникше Наталья ЧЕГАЕВА вашешта:

– Тӱрлӧ чер ик семын палдырнен кертеш. Мутлан, тыланда шӱм корштымыла чучеш, чынжым гын ӧрдыжлу кокласе невралгий але пагар-шолора корнын черже тургыжланджарат.

Участкысе терапевт – кугу шинчымашан врач. Тудо лачшымак мо корштымым рашемда да кӱлешан специалистын приёмышкыжо колта. Тылеч посна, аҥысыр специализациян врачлан диагнозым пеҥгыдемдашыже да ончыкыжым эмлыме радамым ойырен налашыже ешартыш шымлымаш-влак кӱлеш лийыт – тиде терапевтын направленийже почеш ышталтеш.

Тыланда хронический черын диагнозшым шындыме, да те аҥысыр специализациян врачын диспансер учётыштыжо шогеда гын, тудын деке логалшашлан терапевтын приёмышкыжо ончылгоч возалташ огеш кӱл.

Тыгодымак офтальмолог, отоларинголог, акушер-гинеколог, врач-психиатр-нарколог, врач-фтизиатр, врач-стоматолог гай врач-специалист-влак деке терапевт деч поснат возалташ лиеш. Тидым медицине организацийын регистратурыштыжо але инфоматыштыже, тыгак Кугыжаныш да муниципал услуго порталыште шке семын ышташ йӧн уло.

М.ИВАНОВА

М.Иванован фотожо/ «Марий Эл» увер агентстве

Опубликовать в Одноклассники

Добавить комментарий