Росстатын данныйже почеш, лектын-пурен кошташ лийме пандус ден омсам 22 процент пӧртыш гына келыштарыме. Тидым калыкым йодыштмо гыч рашемдыме. Тылеч посна пандусым шындыме нерген пуымо увер таче кечылан шукыж годым тоштемшылан шотлалтеш, молан манаш гын тыгай сынан ятыр объект лӱдыкшыдымылык шотышто йодмашлан келшен ок тол. Чыла тидым шотыш налын, Общероссийский калык фронт Паша министерствыш элыштына мыняр пӧртым инвалид-влаклан келыштараш кӱлмым шотлаш темлен. Кызыт ты шотышто раш информаций уке. А тудын деч посна бюджетыш инвалид-шамычлан куснылмо йӧным ышташ оксам пышташ огеш лий.
ОНФ-ын «Калык экспертизе» рӱдержын экспертше-влак тений идалык тӱҥалтыште ямдылыме инвалид-влакын реестрыштым негызлан налаш да тудым калыкын илыме условийжым ончыктышо сведений дене темаш темлат. Кызыт тиде спискыш Пенсий фонд, Социальный страхований фонд, медико-социальный экспертизе бюро да моло ведомство сведенийым пуат. Шушаш ий 1 январь гыч реестр штатный режим дене пашам ышташ тӱҥалшаш.
– Тиде информаций полшымо дене лачшымак мыняр инвалидын илыме верышкыже пандус ден келшыше омсам шындаш кӱлмӧ рашемдалтеш, тудын дене пырля роскотат палемдалтеш, – умылтара ОНФ-ын «Калык экспертизе» рӱдержын директоржо Виктор Рожков. – Тидыже регионласе капитальный ремонт оператор-влакланат кугу полыш лиеш.
М.ИВАНОВА.
