СПОРТ

Имне спорт: Кудалыштыныт, чаракым сеҥен тӧрштылыныт

Медведево посёлко воктенсе ипподромышто мотор пайрем эртен. Районысо «Пеледыш пайрем» годым йўран игече лийын гын, имне спорт таҥасымашлан чевер кече шыргыжын. 

Сандене ончаш ятыр еҥ погынен, трибунышто эсогыл вер лийын огыл. Оҥай, но ты гана таҥасымашым эскераш, каналташ толшо ўдырамаш-влак англичан аристократке-шамыч деч нимыняр ойыртемалтын огытыл: чапле шляпам, мотор тувырым чиеныт… Тидыже шукыштлан шинчаш пернен.

Медведево районын первенствыштыже эн ончыч самырык имне дене таҥасыше-влак лектыныт. Варажым ончышо-влак Йошкар-Ола, Оршанке, Советский, Морко да Медведево районла гыч толшо участник-влакым ужыныт. Тыгак Пенза, Казахстан гычат уна-влак вийыштым тергеныт. Чылаже вич тўшка стартыш лектыныт.

Кок ияш Принц Мио имньыж дене С.Иванов, Чудище имне дене О.Алексеева, кум ияш Секунд имньыж дене В.Квасов, кум ияш Знаменосец имньыж дене А.Макарова, кугурак ийготан яндар вўран Аксункар иньыж дене В.Квасов ойыртемалтыныт.

Ты таҥасымаш район кўкшыт деч кугурак лийын манашат келшен толеш.  Вет тушто Татарстаныште эртыше Сабантуйышто сеҥыше Анна Макарова ден Сергей Ивановат вийыштым тергеныт. Спортын национальный видыштыже шуко участник коклаште сеҥышыш лекмаш мемнан имнешке-влакын мастар улмыштым ончыкта.

Таҥасымаш годым ончышо-влакым концерт номер дене куандареныт. Российысе «Диво» рекорд книгаш логалше Игорь Игнатьевым моткоч шокшын вашлийыныт. Тудо ик гана веле огыл шкешотан трюкшо дене телешоушто выступатлен. Тыгодым тудын южо номержым ончышо-влак шкеак ыштен ончен кертыныт.

Икманаш, имне дене таҥасымашат, концертат ончаш толшо-влаклан шуко жаплан сай шарнымашым коденыт.

Е.Эшкинина.

Опубликовать в Одноклассники

Добавить комментарий