Марий Эл радион эфирыштыже «Ондаксым шарналтен» муро пытартыш жапыште чӱчкыдынак йоҥга. Тудым Кужэҥер район Йӱледӱр ялыште шочын-кушшо, а кызыт ешыж дене Шернур посёлкышто илыше Светлана АНТОНОВА мура.
Мурылан шочаш мо амалым ыштен? Ӱдырын репертуарже кугу мо? Нине да моло нерген шкеж дене мутланышна.
— Света, тыгай мурым шочыкташ мо амалым ыштен? Мутшо ден семжым кӧ возен?
— Мурылан мутым Христина Александрова возен, а семым Виктор Апталиков келыштарен. Тиде муро шӱм коржтымо, чон шортмо жапыште шочын. Куштылго огыл татым чытен лекташ кум еҥ полшен. Нунылан тауштымо, пӧлек семын тиде муро шочын. Жапыштыже ӱшанле йолташ, эҥертыш лиймыштлан да нунын дене мыйым ваш ыштымыштлан Юмылан эреак тауштем. Адакшым тӱрлӧ чаракым сеҥымеке веле тиде муро шочын.
— Кунамрак мураш кумылаҥынат?
— Изинекак. Тидлан йочасадыш коштмо годым музык дене туныктышо Эмма Витальевна Леухина кугу шӱкалтышым ыштен. Ача-ава-влак ончылно икымше гана ур, шоҥшо нерген мурым муренам. А вара икымше классыш кайымеке, Шинчымаш кечын, руш мурым йоҥгалтараш йодыныт ыле. 3-шо, 4-ше класслаште «Самырык тукым» конкурсыш ушненам. Тидлан кӧра марий йылме ден литературым туныктышо Нина Ивановна Иванова «Мыйын уло курчакем…» мурым ямдылен. Шарнем, лауреат лӱмымат налынам ыле. Тиддеч вара «Алло, мы ищем таланты» конкурсышто, У ийлан да моло пайремланат сценыш лектынам. Изиэм годым верысе культур пӧрт пеленысе «Ложкари», «Юный барабанщик» кружоклаш ӱдыр-влак дене коштынна, районысо да республикысе конкурслаште вийнам тергенна. Чолгалыкем онченак, очыни, школ директор Зинаида Яковлевна Рыбакова Национальный президент школышко тунемаш каяш темлен ыле. Прослушиванийым эртенам ыле, но ача-ава пелен лиймем шумылан кӧра тореш лийынам.
Студент жапыште «Автодор» пеленысе «Югорно» бард клубыш мураш коштынам, но тӱрлӧ амаллан кӧра тиде пашам кудалтенам.
— Умбакыже муро аланыште кушкаш шонымашет уло?
— Уло, ме кажныже могай-гынат волгыдо шонымаш дене илена. Ончыкыжым репертуарым пойдараш шонем.
— Марий мурызо-влак кокла гыч кӧн творчествыжым эскерет?
— Станислав Шакировын, Светлана Строганован репертуарышт келша, тыгак Виктор Апталиковын, Марина Воронцован усталык корнышт лишыл улыт. А Татьяна Денисован келге шонымашан, илыш нерген мурыжо-влак чонешак логалыт.
— Радиошто мурыметым икшывет-влак колыныт?
— Колыныт да пеш куаненыт. Мурым возаш кайыме деч ончыч эше мӧҥгыштӧ репетицийым эртарымемак ужыныт. Садлан нуно икымше колыштшем, аклышем улыт. А лишыл еҥ-влак мотокчак ӧрыныт ыле, йыҥгырат шуко пурен. Мутат уке, родем-влак йывыртеныт, куан шинчавӱд дене мыйым саламленыт. Радиошто муро йоҥгалтмым кызыт икшывем-влак колыт да «Авай, тидыже тый мурет!» манын куржын толыт. Такшым йоча-шамыч мурым чот йӧратат, шепкаште кийымышт годым мурымо малтыме муро ушешышт киен кодын витне.
— Изиэт годым кӧ лияш шоненат?
— Туныктышо, кондитер але мурызо… Ялысе школ деч вара Марий кугыжаныш университетыш руш йылме да литератур туныктышылан тунемаш пуренам. Студент пагытыштак Йошкар-Оласе 20-шо номеран «Дюймовочка» йочасадыште воспитательлан пашам ыштенам. Тиддеч вара Шернурышто тыгаяк сомылым шуктенам, но кызыт тӱрлӧ амаллан кӧра мӧҥгыштӧ икшывем-влак дене шинчем. Йоча-шамычым моткоч йӧратем, сандене чонем йочасадыш але школыш шупшеш.
— Могай илыш-девиз дене илет?
— Илышыште порылыкым да чыным аклем. Сандене калыкын тыгай ойжо келша: «Порылык дене авалтше еҥым осал лунчыртен огеш керт».
Алевтина Байкова мутланен.
Фотом еш альбомжо гыч налме
