15 ноябрь гыч 2 декабрь марте Марий Элыште «Бей в набат!» республиканский профилактический акций эрта.
Тудын межведомственный мероприятийже-влак планым Марий Эл правительстве председатель, Марий Элын Антинаркотический комиссийжын председательже Александр Евстифеев пеҥгыдемден.
Акций республикыште 17-ше ий эртаралтеш. Тудо таза илыш дене илаш кумылаҥдаш, самырык-влаклан психоактивный вещества, тыгодымак шупшмо вартыш-влакын могай эҥгекым ыштымыштым умылтараш, наркоманий, СПИД чер, моло нерген каласкалаш да палдараш виктаралтын.
Коронавирус инфекций шарлыме лӱдыкшым шотыш налын, акций дене келшышын палемдалтше чыла гаяк мероприятий онлайн йӧн дене эртат. Тыге, мутлан, 16 ноябрьыште республиканский онлайн-семинар эртен. Таче практический онлайн-семинар лийын. 18 ноябрьыште кумылан-влак вебинар йӧн дене мутланат. Моло кечынат мероприятий-влак вучат.
Тыгак 16 ноябрь гыч 1 декабрь марте образовательный организацийлаште тунемше-влак коклаште «Ме — ЗОЖ верч!» видео-визитке республиканский заочный конкурс эрта.
Тидын дене пырля организаций ден учрежденийлаште творечкий конкурс, фестиваль, увер да просветительский мероприятий-влак, «айык урок», икмыняр моло лийыт. Нине мероприятийыш Марий Элысе МВД-н наркоконтроль управленийжын, Республиканский наркологий диспансерын, икмыняр моло учрежений ден организацийын еҥышт ушнат.
Акцийын пытартыш кечынже, 2 декабрьыште, онлайн йӧн дене «Илаш! Йӧраташ! Ӱшанаш!» регион-влак кокласе антинаркотический форум лиеш.
Л.КАМАЛЕТДИНОВА
