Марий Элым вуйлатыше Юрий Зайцев Запорожский областьыште ӱмыр лугыч лийше Наталья Кострован ачаж ден аважлан Пирогов орденым пуэн.
Медикын ача-аваже Николай ден Наталья Костровмыт, Павел эргыж дене мутланымыж годым республикым вуйлатыше Наталья Николаевнан уста профессионал, пеҥгыде илыш рӱдан айдеме, элнан патриотшо лиймыжым палемден.
«Россий Федераций президент Владимир Владимирович Путинын указшым шуктымо шот дене мыланем тыланда кугу наградым – ӱдырдам колымыж деч вара палемдыме Пирогов орденым – пуаш чап. Тиде награде профессиональный порысым шкем чаманыде шуктышо врач-влаклан кучыкталтеш. Наталья Николаевна тушко икымше кудалын, кушто неле, кушто орлык да ойго. Тудо йоча-шамычлан кӱлешан чыла полышым пуэн, передовойышто лийын. Ме палена, тушто полыш чынжымак моткоч кӱлеш. Йоча-влакын тазалыкышт шотышто нигӧ тургыжланен огыл. Тендан ӱдырда ик эн ончыч полшаш кайыше-влак коклаште лийын. Но, чаманаш гына кодеш, трагедий лийын. Наталья Николаевна герой семын колен. Тудо мыланна, шкем чаманыде, профессиональный порысым мучаш марте шуктышо пример семын кодеш», – палемден Юрий Зайцев.
Врач-педиатр Наталья Кострован илышыже 7 декабрьыште Запорожский областьыште кӱрылтын. Тудлан 35 ий лийын. Пытартыш кок ий Медведево районысо рӱдӧ больницыште ыштен, ӱмашсе июль гыч поликлинический отделенийым вуйлатышын пашажым шуктен. Н.Кострова Марий Эл гыч медик-влак дене пырля Россий Федерацийын утарыме ик кундемышкыже йоча-влаклан профосмотрым эртараш каен. Куснылшо бригадым вуйлатымыж годым корно-транспорт азапыш логалын. Тудын9 ияш эргыже кодын.
М.ИВАНОВА
