Икте-весылан полшымо #МеПырляУлына общероссийский акцийын «Кочкыш йӧрвар» проектшым илышыш пуртымо кышкарыште Волжский районышто пашам ыштыдыме 65 ий деч кугурак 729 еҥлан продукт наборым мӧҥгышкыштак намиен пуымо.
Тиде поро сомылым Волжский район администрацийын, Калыкым социально обслуживатлыме комплексный рӱдерын пашаеҥже, #ОНФ-ынМолодёжкыжо командын чолга еҥже, Купсола селасе «Покровский» кутырын казакше да волонтёр-влак шуктеныт.
— Икымше кечын волонтёр йолташем Евгений Иванов дене Приволжский посёлкышто илыше 35 пенсионер деке миен шуна. Илалше-влак кокла гыч иктышт кочкышым кугыжаныш велым чылт яра ойырымылан пытартыш тат марте ышт ӱшане, весышт тудым налаш тореш лийыч да нужнарак еҥлан але ешлан пуаш темлышт, кумшышт сатун акшым вараже пенсий гыч кучен кодат манын кокытеланышт, но можым-кузежым радамын умылтарымек, полышым куанен нальыч да тупна йоммешке тауштышт, — каласкала Юлсер кундемысе #ОНФ-ынМолодёжкыжо командын чолга еҥже Денис Смирнов. – Вӱргечын йӱр чот йӱрӧ, туге гынат эше 20 пенсионер деке миен шуна. Мыйым икте куандарыш: коронавирусын пандемийже пагытыште калык порырак, икте-весылан полшаш кумыланрак лийын.
Тиде кочкыш йӧрварын икымше партийже лийын. Ынде кокымшо партийым вучат.
М.ИВАНОВА
