Инвестиций проект
Технопаркым ышташ палемдалтеш
Марий Эл вуйлатыше Юрий Зайцев ден «Элемент» ПАО-н президентше Илья Иванцов республикыштына радио- да микроэлектронике сферым вияҥдыме нерген каҥашеныт.
Ончыкыжо «ЗПП» АО кумдыкышто радио- да микроэлектронике шотышто технопаркым ышташ да республикын эше ик ончыл предприятийже «ММЗ» АО дене коопераций кылым вияҥдаш палемдалтеш. Ты сферысе чыла производство процессым мемнан регион кундемыште чумырымаш да шарен толмаш Марий Элын экономикыжым у кӱкшытыш нӧлталшаш, палемден Юрий Зайцев.
Эше ик йодыш «Элемент» ГК-ш пурышо Полупроводник прибор заводын кластерный инвестиций проектше дене кылдалтын. Тудын кугытшо 6,6 миллиард теҥгеш шуэш. Средствам кӱлешан продукцийым лукмашке, предприятийын инфраструктурыжым кумдаҥдымашке колташ палемдалтеш. Тидыже элыштына интегральный микросхемым ыштен лукшо-влакын кушкын толшо йодмашыштым шукташ металлокерамике корпусым шукырак лукшашлан ышталтеш.
«2021-2022 ийлаште предприятий ямде продукцийым лукмашым вич пачаш кугемден. Тыгайже эше лийын огыл. Ме у йыжыҥыш куснена. Регионысо предприятий-влак коклаште коопераций кылым чакемдыман. Республик кундемыште радиоэлектрон продукцийым ыштыме процессым, кристалл производство деч молыжым, тӱрыс шукташ лиеш. Корпус ден печатлыме платым лукмо производство уло. Тысе ММЗ «Элемент» компаний-влак тӱшкан продукцийжым кучылтшо ик эн кугу предприятийлан шотлалтеш. Ме тысе правительстве велым умылымашым шижын шогена. Тӱшкан гына умбакыже вияҥаш лиеш», – каласен Илья Иванцов.
Пырля шуктымо проектын кӱлешан да пайдале улмыжым кок велымат пеҥгыдемденыт.
Снимкыште: «Элемент» ПАО вуйлатыше дене каҥашымаш.
Денис Речкинын фотожо.
Марий Эл вуйлатышын пресс-службыжын уверже негызеш Юрий Исаков ямдылен.
