Руэм посёлкысо шуко профилян лицей-интернатыште «УмКа» профилян смене почылтын. Тудо уло республик мучко ик эн ушан да чолга 77 ӱдыр-рвезым поген.
Сменыште лийме годым йоча-шамычлан вич предмет – руш йылме, математике, физике, химий, биологий – гыч иктыж дене келге шинчымашым налаш йӧн лиеш. Нунын коклаште тунемше-влаклан эртарыме всероссийский олимпиадыште сеҥыше да призёр-шамычат улыт.
Арня жапыште йоча-влаклан ятыр оҥай мероприятий лиеш: тунемыт усталык пашам ыштат, вашлиймаш да спорт таҥасымаш, конкурс, модыш-шамыч эртаралтыт. А шинчымашыжым нуно лицей-интернатын кызытсе жаплан келшен толшо оборудованиян кабинетлаштыже да лабораторийлаштыже погаш тӱҥалыт.
Мероприятийлаште шкенжым сай могырым ончыктышо тунемше-влаклан у тунемме ийыште Шуко профилян лицей-интернатын Талантан йоча-влак дене пашам ыштыше рӱдерыштыже шинчымашым погаш йӧн лиеш.
Г.КОЖЕВНИКОВА