2023-2024 тунемме ийыште 11-ше классым тунем пытарыше-влакын «За особые успехи в учении» II степенян медальым да отличиян аттестатым (2023 ий 4 августысо 479-ше №-н Федеральный закон) налаш правашт уло.
У медаль ончычсо деч ший тӱсыж дене гына ойыртемалтеш. Ойыртемже – выпускник-влакын успеваемостьыштышт. Шӧртньӧ медаль дене чыла общеобразовательный предметым «визытан» отметкылан тунем пытарышым палемдат, а шийлан кокыт деч шуко огыл «нылытан» лийшаш. Адакшым Иктешлыше кугыжаныш экзаменат шотыш налалтеш. Выпускник эн изи «лондем» семын палемдыме баллым погышаш, тыгак руш йылме да шке кумылын ойырен налме предмет дене 60 деч шагал огыл баллже лийшаш.
Ушештарена, шӧртньӧ але ший медаль дене Россий империйыште гимназий ден училищылам сайын тунем пытарыше-шамычым палемденыт. 1917 ийысе Октябрь революций деч вара тидым ыштымым чарныме, 1945 ийыште уэш пуаш тӱҥалыныт. Но 2024 ийыште адакат вашталтыш пурталтын: шӧртньӧ медальым гына коденыт.
Отличиян аттестатлан (кандалге тӱсан) налаш кокыт деч утларак «хорошо» отметке, а молыжо «отлично» лийшаш. Йошкар аттестатым ончычсо йодмаш почешак пуат. Но профилян математике дене Иктешлыше кугыжаныш экзаменыште обязательно 70 баллым погаш огеш кӱл, руш йылме да ойырымо вес предмет дене гына тыгаяк результат лийшаш.
Г.Кожевникова
