Россий кече вашеш 11 июньышто Марий Эл вуйлатыше Александр Евстифеев республикын почетан гражданже-влак – регионым да пӱтынь элым тӱзатышаш верч тыршыше, мер пашашке чолган ушнышо еҥ-шамыч – дене вашлийын.
Александр Евстифеев чолгалыкым ончыктымыштлан да гражданский обществым ыштымашке кугу надырым пыштымыштлан тауштен. Тылеч вара тудо республикын экономический ден социальный сферылаштыже пытартыш жапыште лийше вашталтыш-влак нерген каласкален. Поснак корным ыштыме да тӧрлымӧ, школым, йочасадым, чоҥымо, ола ден поселко-влакым тӱзатыме, моло нерген ойлен. Тыгак Федераций Советыште Республикын кечыже-влакым сайын эртарыме да тылеч варак Валентина Матвиенкон аэропортым пашашке колташ полшаш кумылаҥмыж нерген эше ик гана ушештарен. Республикыште самырык-шамыч денат паша чолган эртаралтеш, кучем образований сферылан кугу тӱткышым ойыра манын палемден.
Регионын социально-экономически вияҥмыж нерген пӱсӧ йодыш-влакым каҥашымаш чай йӱмаш коклаште эртен. Вашлиймашын участникше-шамычат республикыште да элыште сай велыш вашталтыш палдырныме нерген ойленыт. Тидыже регионышто тӱҥ шотышто национальный проект-влакым илышыш пуртымылан кӧра лиеш манын палемденыт.
Ты вашлиймашыштак икмыняр еҥлан наградым кучыктеныт. Мутлан, Россий Федераций Президентын Тауштымашыж дене Сокыр-влаклан республиканский библиотекын директоржо Татьяна Епанчинцева ден «Афганистанын ветеранже-влакын Российысе ушемышт» общероссийский мер организацийын региональный пӧлкажын вуйвер председательжын икымше алмаштышыже Юрий Носырев палемдалтыныт.
Нунын радамыште тыгак Йошкар-Оласе Л.И.Соколова лӱмеш йоча эмлымверын тӱҥ врачшын медицинский часть шотышто алмаштышыже Зинаида Гордеева ден республикын Кугыжаныш счетный палатыжын аудиторжо Евгений Пайдышев улыт. Нунылан «За заслуги перед Марий Эл» орденын медальжым кучыктеныт.
Вашлиймаш мучаште Марий Эл вуйлатыше Александр Евстифеев погынышо-влаклан умбакыжат шкан ӱшаныше лияш, шумо кӱкшытеш шогалаш огыл, а умбакыже сеҥымаш деке лишемаш тыршаш тыланен.
Л.КАМАЛЕТДИНОВА.
