Кодшо арня мучаште Йошкар-Олаште «СМИротворец» всероссийский конкурсын Юл кундем федеральный округын йыжыҥже эртен.
Тудым Калык-влакын пашашт шотышто федеральный агентстве, Межэтнический журналистике гильдий Россий Федерацийын «Кугыжаныш национальный политикым илышыш шыҥдарымаш» кугыжаныш программыж дене келшышын эртареныт. Тений конкурс луымшо лийын гынат, Йошкар-Олаште Юл кундем округысо журналист-влакын пашаштым икымше гана иктешленыт да сеҥыше-влакым торжественно палемденыт. Сандене тиде кечылаште Йошкар-Олаште наций да конфессий-влак кокласе кылым ончыктышо индеш регионын эн сай журналистше-влак лийыныт. Нуно Марий Элна, калыкна, тӱвыра да йӱлана дене веле огыл палыме лийыныт, тӱрлӧ семинарыште, «йыргешке ӱстелыште» участвоватленыт.
Икымше кечын Творческий ушем-влакын пӧртыштышт республикысе да районласе массовый информаций средстве-влакын пашаеҥыштлан «йыргешке ӱстел» эртен. Тушто журналист-влакым калык, конфессий-влак кокласе кылым кузе сайрак, оҥайрак, чынрак ончыкташ туныктеныт. Тиде мемнан эллан, тыгак регионланат моткоч кӱлешан йодыш, вет Российыште 193 тӱрлӧ калык ила. Марий Элат ты шотышто моткоч тӱрлӧ тӱсан. Сандене тушто конкурсын номинантше веле огыл, организаторжо, экспертше, Марий Элын Тӱвыра, печать да калык-влакын пашашт шотышто министерствын еҥже-влак лийыныт. Мутланымаш диалог семын эртен. Тудым тӱвыра, печать да калык-влакын пашашт шотышто министрын алмаштышыже Михаил Матвеев вӱден. Тӱвыра, печать да калык-влакын пашашт шотышто министр Константин Иванов массовый информаций средстве-влакын калык ден конфессий-шамыч кокласе кылым пеҥгыдемдымаште кугу пашаштым палемден.
Конкурсын ик эн чолга организаторжо, Межэтнический журналистике гильдийын президентше Маргарита Лянге шкежат толын ыле. Тудо Российыште илыше тӱрлӧ калыкын историйже, тӱвыраже, йылмыже нерген возымо публикаций-влакын кӱлешлыкыштым палемден, гильдийын эртыме корныжо, тудын проектше-влак дене палдарен. Марий Элысе журналист-влакын паша лектышыштымат кӱкшын аклен. Каласен кодыман, «йыргешке ӱстел» годым мемнан редакторна Александр Абдулов докладым ыштен. Тудо регионысо журналист-влакым тургыжландарыше икмыняр пӱсӧ йодышым тарватен.
«Йыргешке ӱстелыште» тарватыме теме шотышак мутланымаш вес кечын национальный президент школ-интернатыште эртыше семинарыште шуйнен. Тушто тыгак конкурсыш Юл кундем округ гыч колтымо эн сай журналист паша-влак дене палдареныт.
Тиде кечылаште уна-влаклан Йошкар-Олаште лийын мом ончаш, молан манаш гын шуко мероприятий эртен. Мутлан, Т.Евсеев лӱмеш тоштерыште тӱнямбал этнокультурный проект-влакын фестивальышт, кок кугу ончер, Сеҥымашын ХХХ идалыкше лӱмеш тӱвыра полатыште калык хореографий тӱнямбал финн-угор фестиваль почылтыныт. Тыгак уна-влак Кужэҥер районысо Визым кундемыште, Оршанке район Тошто Крешын ялысе М.Шкетан лӱмеш тоштерыште, Ремесло пӧртыштӧ лийыныт. Нунылан чылажат моткоч келшен. Кажынже гаяк Марий Элым шкаланышт почмылан куанен ойленыт да жап шагал лиймылан ӧкыненыт.
А изарнян кастене национальный президент школ-интернатын концерт залыштыже конкурсышто сеҥыше-влакым палемденыт. Кӧ вара нуно улыт? Конкурс вич номинаций дене эртен. Кажныштыже икымше, кокымшо да кумшо верлам палемденыт. Марий Эл гыч номинант-влак радамыш кок паша логалын. Тиде — «Печать» номинацийыште «Марий сандалык» журналын пашаеҥже Сергей Щегловын «Тоншаево. Осеннее время» статьяже. Тудо Угарман кундемыште илыше марий-влак нерген каласален. Куанен палемдыман: автор икымше верыш лектын.
«Телевидений» номинацийыште шорт-листыш тыгак «МЭТР» теле-радиокомпанийын темлыме передаче циклже логалын, тиде — «Свое ремесло» (авторжо Алеся Владимирова), «Колесим по краю» (авторжо Ирина Молоканова) да «Проще простого:Марий Эл — край гуслей»» (авторжо Мария Шавкунова). Мемнан тележурналист-влак тыгак икымше лийыныт.
Моло номинацийыште икымше верыш логалше-влакымат ончыктена. «Интернет» номинацийыште Коми гыч «7X7» сайтыште савыктыме Ольга Пастухова ден Алексей Сабельскийын «Безграничные судьбы» материалышт палемдалтын. «Радио» номинацийыште Ижевск ГТРК-н «Нити времени» программыжым (авторжо-влак Дина Седова ден Владимир Михайлов) эн сайлан шотлымо. Пытартыш «Шочмо йылме-влак» номинацийым тений гына конкурсыш пуртеныт. Тушто икымше верыш Ижевск увер агентствын пашаеҥже Диана Ворончихинан «удмурт.net вань или нет» материалже лектын.
Сеҥыше-влаклан конкурсын статуеткыжым да шарнымашан пӧлекым кучыктеныт. Нуным саламлаш Марий Эл правительстве председательын икымше алмаштышыже М.Васютин, тӱвыра, печать да калык-влакын пашашт готышто министр К.Иванов, алмаштышыже Г.Ширяева миеныт. Чылажат моткоч торжественно эртен. Мучашлан чылан пырля шарнаш фотош войзалтыныт.
Светлана Носова.
Снимкылаште: «Смиротворец» конкурсын Юл кунде федерал округын йыжыҥже Йошкар-Олаште эртыме годым.
М.Скобелевын, И.Речкинын, авторын фотошт.
