Кодшо арнян регионыштына пӱсӧ шоло инфекций дене черланыме 87 случайым регистрироватлыме. Тиде чот кодшо ий тыгаяк жап деч 22,5 процентлан да шуко ияш показатель деч 4,9 процентлан шукырак. Черланыше-влакын чумыр чотышт гыч 74,7 процент еҥже 14 ияш марте йоча-влак улыт. Волжск олаште, Йошкар-Олаште, Медведево да Параньга районлаште сӱрет поснак начар, молан манаш гын тыште палынак шукын черланеныт.
Тылеч посна кодшо арнянак ОРВИ дене 1833 еҥ черланен, верге палан коля йӱштымужо дене – 14 еҥ, ырлыган дене – 12 еҥ. Пудий 116 еҥым пурлын.
М.ИВАНОВА
