3 мартысе «Марий Эл» газетнан «Пызлытул» лаштыкыштыже «Тауштена да вуйнам савена» материалем лектын ыле. Чонем дене марий калык гыч улмыжым шижын, Йошкар-Олаште илыше 103 ияш ветеран Иван Алексеевич Алексеевын шочмо вержым Социальный вияҥмаш министерствын пресс-службыжын полшымыж дене рашемдаш лийым.
«Морко район Корамас ял гыч», – вашештышт тушто. Шкат паледа, Морко районышто кок Корамас уло: Изи да Нуръял. Ик йодыш почеш весе лекте: Иван Алексеевич содыки кудо ялже гыч? Но Арын ял шотан илем администрацийыште ветеранын тиде кундемыште шочмыжым да илымыжым ышт пеҥгыдемде. Туге гынат материалышкем, шӱмем вургыжынак, И.Алексеев Морко кундем гыч манын ешарышым.
… Газетын ош тӱняшке лекмекыже, редакцийышкына Йошкар-Олаште илыше И.Андреев йыҥгыртыш. «Иван Алексеевич Алексеев – пошкудем, Волжский район Корамас кундемысе Пезмучаш ялыште шочын. Кугу Отечественный сар деч вара верысе «Большевик» колхозын председательже лийын. Ешыж дене Йошкар-Ола гыч ялыш унала толмыжым моткоч сайын шарнем. Иван Алексеевичым 100 ияш юбилейже денат саламленам», – мучаш марте лончылен шуктыдымо йодышем рашемдыш Иван Аркадьевич.
Теве тыге. Марий Элыште эн шуко, 103 ий, илыше ветеран Иван Алексеев дене ик район гыч улына улмаш! Кужу да шуко шӧрынан илыш корным эртыше землякемлан эше ик гана вуем савем, шочмо вержым йоҥылыш ончыктымемлан нелеш налаш огыл йодам. А вес землякем Иван Андреевлан газетнан поро йолташыже улмылан да журналист-влаклан полшен шогымыжлан уло кумылын тауштем.
М.ИВАНОВА
