Россий президентын грантшым Марий Эл гыч коммерческий огыл организаций-влакын 42 проектышт «тавала».
РФ президентын грантшым граждан обществым вияҥдаш ойырымо 2021 ийысе икымше конкурсыш йодмашым налмым чарныме.
Конкурсыш элнан чыла регионжо гыч коммерческий огыл организаций-влакын 10063 проектышт пурен. Марий Элысе коммерческий огыл организаций-шамыч 42 проектым колтеныт. Нуно тӱҥ шотышто тӱвыра ден сымыктыш аланлан, социальный обслуживанийлан, граждан-влакын тазалыкыштым аралаш, граждан-шамычлан социальный полышым пуаш, таза илыш-йӱлам чапландараш полшымашке виктаралтыныт.
Конкурсым 2021 ий 15 январьыште иктешлаш палемдыме, да сайлан шотлымо проект-шамыч 1 февраль гыч стартым налын кертыт.
Вес конкурсыш йодмашым 2021 ий 1 февраль гыч налаш тӱҥалыт. Проектым 15 март йотке пуаш лиеш.
Ушештарена: сентябрьыште у коронавирус инфекций дене кучедалме пагытыште социальный пашам шуктышо коммерческий огыл организаций-шамычын ныл проектыштым илышыш пурташ тӱҥалме. Нуным Президент грант фонд 2020 ийысе специальный конкурсыштыжо сайлан шотлен.
М.ИВАНОВА
