Шернур районысо Купран школ кугужак огыл. Ик пачашан, пу оралтым XIX курым тӱҥалтыште чоҥымо. Кызыт тушко Купран, Чылдемыр, Палашнур ялла да Шернур посёлко (ик икшыве) гыч йоча-влак тунемаш коштыт.
Школым ынде кокымшо ий Татьяна Булыгина вуйлата. Теве кодшо гана мийымына годымат Татьяна Рудольфовна мемнам порын вашлие.
— Школыштына кызыт 58 тунемше шинчымашым нӧлта. Тений куд икшыве индешымше классым тунем лектеш, а икымше классыште — индешын улыт, — палдара школ вуйлатыше. — Индешымше класс деч вара ӱдыр-рвезе-влак Шернурыш тунемаш куснат але иктаж техникумыш, училищыш пурат.
— Школыштына марий йылмым шочмо йылме семынак тунемына. Мутат уке, йоча-влак рушаҥын толыт, но урокыштына уло кумылын колыштыт, возат, мутланымашке ушнат, — палемдыш марий йылмым туныктышо Нина Малинина.
Йыҥгыр йӱкш шергылтмеке, Нина Витальевна визымше класс дене эртарыме урокышкыжо пураш темлыш. «Марий Эл» газет редакцийын тӱҥ редакторжын алмаштышыже С.Пехметова дене пырля парт коклаш шична. Туныктышо йоча-влак дене «Йылме» теме дене мутланымашым эртара, меат тӱткын колыштна. «Да… лийын мемнанат тыгай жап, парт коклаште умшам карен манме гай туныктышын ойлымыжым колыштынна. Эх, пӧртылташ ыле тудым!», — ушыштем пӧрдын шонымаш. Но ала молан дыр туныктышо ден тунемше-влак коклаште мутланымаш вес семын эртымыла чучо. Очыни, тунемме программе вашталтме дене чылажат кылдалтын.
Пел урок эртымеке, Нина Витальевна мыланна мутым пуыш. Икшыве-влак «Марий Эл» газетнан шочмыжо, вияҥ толмо корныж, редакций паша нерген каласкалымынат тӱткын колыштыч. Тӱрлӧ еҥ дене вашлиймаш, оҥай мероприятийлаште лийме да чылажымат газет лаштыкыштына ончыктымо нерген ойлымат нунын кумылыштым савырыш.
105 ий марий йылме дене савыкталтше изданийнам визымше классыште тунемше-влак кокла гычат икмынярынже лудыт.
— «Йоча тӱня» лаштыкым шергалаш келша, поснак вуйушым пударатыше йодыш, модыш-влаклан вашмутым кычалаш келша, — маньыч ӱдыр-рвезе-влак.
Урок деч вара погынымашке ача-ава-влакат толыныт ыле. Нунын денат вашлийме мутланымашна сай кумыл дене эртыш. Шижалте, Чылдемыр кундемыште «Марий Эл» ден «Сурт-пече» газетна-влакым кажне гана куанен вучат да тӱҥалтыш гыч мучаш марте куанен лудыт.
Тек ончыкыжымат шочмо йылмына дене лекше газетым лудшына-влак лийыт да ий еда ешаралтыт. Тыге ме марий йылмынам, калыкнам арален коден кертына.
Алевтина БАЙКОВА
Авторын фотожо.
Снимкыште: 5-ше классыште тунемше-влак дене вашлиймашна кумылын эртыш.
