28 ноябрьыште Т.Евсеев лӱмеш национальный тоштерыште «Радуга возможностей» ончер пашам ышташ тӱҥалын.
Инвалид-влакын декадыштлан пӧлеклалтше ончерым тоштер ден Марий Эл Республикын Социальный вияҥмаш министерствыже организоватленыт. Тушко изобразительный искусство, фотографий да декоративно-прикладной усталык дене кылдалтше паша-влакым пуртеныт. Участник-шамычын ийготыштым шотыш налын огытыл, сандене йоча-влакынат, кугыеҥ-шамычынат усталыкыштым аклаш йӧным ыштеныт. Ончерыште Марий Элысе чыла олаште да районышто илыше инвалид да калыкым социально обслуживатлыше тӧнежлаште пашам ыштыше-влакын усталыкыштлан верым муыныт.
«Радуга возможностей» ончер республиклан моткоч кӱлешан, вет тудо инвалид-влакын усталыкыштым вияҥдаш да калыкын тӱткышыжым нунын проблемыштлан ойыраш виктаралтын.
М.ИВАНОВА.