УВЕР ЙОГЫН

Пашазе кид эре кӱлеш

Пашазе профессий-влаклан полышым пуымо шонымаш дене Марий Эл Правительстве пел миллион теҥге оксам ойырен.

«WorldSkills» стандарт дене профессиональный мастарлык шотышто национальный да тӱнямбал чемпионатлаште сеҥышыш лекше да призер-влакым, нунын наставникыштым палемдыме амал дене Марий Эл Правительствыште Марий Эл вуйлатышын грантшым пеҥгыдемденыт.  Окса республикысе бюджет гыч ойыралтеш.

Тыге, тӱнямбал чемпион да тудын наставникше 70 тӱжем теҥге гыч  грантым налын кертыт, кокымшо ден кумшо верлан — 50 да 30 тӱжем теҥге гыч. Национальный чемпионатыште сеҥыше да тудын наставникше 50 тӱжем теҥге гыч налыт. Кокымшо ден кумшо верлан  — 30 да 20 тӱжем теҥге гыч.

Правительствын кӱштымашыжым шуктымым правительстве председательын икымше алмаштышыже, тӱвыра, печать да калык-влакын пашашт шотышто министр Михаил Васютин  тергаш тӱҥалеш.

 «WorldSkills International» — тиде коммерческий огыл тӱнямбал  ассоциаций. Тудо уло тӱня мучко профессиональный мастарлык ден  квалификацийын статусыштым, стандартыштым нӧлталаш , тӱнямбал кӱкшытан  таҥасымашым эртарыме гоч пашазе профессий-влакым популяризироватлаш полша. 22 ияш марте  самырык еҥ-влак тӱрлӧ шӧрынан таҥасымаште шке вийыштым терген кертыт. Кок ийлан ик гана  пашазе професий дене тӱнямбал таҥасымаш эртаралтеш. Тудым эше пашазе кидлан олимпиадат маныт. 2017 ийыште тыгай чемпионат Объединенный Араб Эмиратыште Абу-Даби олаште эртышаш. 2019 ийыште тудо Озаҥыште лиеш.

С.Носова.

Опубликовать в Одноклассники