УВЕР ЙОГЫН

Идалык ласкан эртен

Марий Элысе Антиктризисный рӱдерыште РСЧС-ын территориальный подсистемыжын пашажым иктешлыме да тенийлан паша планым палемдыме шотышто  республиканский сборжо эртен.

Ты системе чрезвычайный ситуацийым шижтарыме да кораҥдыме дене кылдалтше пашам шукта да исполнительный, верысе кучем ден организаций-влакым уша. Заседанийым Марий Эл правительстве председательын икымше алмаштышыже Михаил Васютин вӱден.

Куанен палемдыман, кодшо ийын мемнан республикыште чрезвычайный ситуаций лийын огыл. Изирак аварий, калыкын илышыжлан лӱдыкшым ыштен кертше технологический ситыдымаш-влак лийыныт гынат, вигак кораҥдалтыныт. Пӱртус мыняр-гынат калыкнан илышыжым нелемден.

 Кодшо ийын чылаже 1733 пожар лийын. Тушто 38 еҥ колен. Но ты шотышто кодшо ийысе сӱрет ончылийысе деч сайрак лийын.  

2019 ийыште шошымсо вӱдшор пагытат икшырымын эртен, кугу туткар лийын огыл. Кеҥеж жапыште 42 гана чодыра ылыжын, ужар поянлыкна 59,4039 гектарыште локтылалтын. Но чыла пожарым пеш писын йӧртенак шогымо, сандене кугу лӱдыкшӧ лийын огыл.

Идалык мучко пӱртӱсыштӧ вашлиялтше, техногенный туткар-влакан, военный условийлан ямдылалтме шотышто икмыняр кугу ученийым эртарыме. Сай ошкыл семын респубилкыште «Система-112» рӱдерым пашаш колтымым аклыман. Тушко пурышо чыла йыҥгырым оператор-влак шотыш налыт да кӱлеш мерым ыштат, экстренный оперативный службылаш колтат. А суткаште тушко 1450 наре гана йыҥгыртат. Мутат уке, тиде системе калыклан полышым пумо пашам писемда.

 С.НОСОВА

Опубликовать в Одноклассники

Добавить комментарий