Марий Элын Тазалыкым аралыме министерствыжын 16 ноябрь эрдене увертарымыж почеш, пытартыш суткаште регионнан больницылаж гыч паремше 22 пациентым мӧҥгӧ колтымо, тыгодымак 69 черлым эмлалташ пыштыме. Тыге, теҥгече эрдене республикнан 10 инфекционный стационарыштыже 1196 граждан у коронавирус инфекций да пневмоний деч эмлалтын. Ты чот гыч 212 пациент неле состоянийыште лийын, 38 черле шодым искусственно вентилироватлыме йӧн дене шӱлен, 523 еҥлан кислород кӱлын.
«Коронавирус: статистика» сайтын 16 ноябрь эрдене палдарымыж гыч, пытартыш суткаште Российыште COVID-19 дене 22778 граждан инфицироватлалтын, Марий Элыште – 49 еҥ. Пандемий пагытыште республикыштына у коронавирус инфекций дене чылаже 6861 еҥ черланен, 5728 пациент паремын, 76 черле колен.
М.ИВАНОВА
