14-24 августышто самырык этно-группо, мурышо да семӱзгарым шоктышо ансамбль-влаклан онлайн режимыште фестиваль эртаралтын.
Тушко Астрахань, Белгород, Воронеж, Тверь, Челябинск областьла, Татарстан, Тыва, Марий Эл республикла гыч 18 усталык коллектив ушнен. Нунын мастарлыкыштым жюри аклен.
«Этно-группо» номинацийыште мемнан республик гыч сеҥышыш иктат логалын огытыл. Мурышо да семӱзгарым шоктышо ансамбль-влак коклаште У Торъял район гыч «Эхо» (вуйлатышыже – Сергей Мухин) кокымшо степенян лауреат лийын.
«Рок-группо» номинацийыште икымше степенян лауреат лӱм дене Медведево районысо тӱвыра ден каныме паша шотышто рӱдер пеленысе «Время пришло» рок-группо (вуйлатышыже – Андрей Лебедев) палемдалтын. Тиде коллективак интернетыште йӱклыме почеш (чылаже 1326 еҥ йӱклен) сеҥышыш лектын.
А.БАЙКОВА
