8 июньышто У Торъял посёлкышто эр годсек сылне муро йӱк йоҥген, рӱдӧ площадьыште калык мӱкшла шолын, вет ты кечын тыште еш-тукым фольклор ансамбль-влакын «Творцы и хранители» II Межрегиональный фестивальышт эртен.
Тений фестивальыш пошкудо Киров область Санчурск район гыч, шкенан республикысе Курыкмарий, Звенигово, Морко, Марий Турек, Оршанке, Параньга, У Торъял, Советский районла гыч 22 еш-тукым фольклор ансамбль ден тӱвыра да каныме учреждений-влакын усталык группышт погыненыт.
Чылаже 170 участник толын. Нуно ты ганат тӱрлӧ йӱлам да музыкальный композицийым ончыктеныт. Тиде, мутлан, «Оръеҥын йолгорныжо», «Сарыш ужатымаш», «Мӱй спас», моло лийыныт.
Молгунамсе семынак фестиваль посёлкысо рӱдӧ площадьыште «Еш династий» декоративно-прикладной усталык, национальный кочкыш выставке да «Детки и предки» фотовыставке дене почылтын. Чыла тидым жюри веле огыл, тыгак ончаш толшо-влакат ужын, аклен, а сийжым эсогыл тамлен кертыныт.
Иктешлымаш дене келшышын, фестивальын гран-прижым «Кыстын Вачи тукым» еш ансамбль (Морко район Тыгыде Морко клуб) сеҥен налын.
«Эн сай еш фольклор ансамбль» номинацийыште I степенян лауреат лӱм дене Домрачевмытын еш фольклор ансамбльышт (У Торъял район Элембай тӱвыра пӧрт) палемдалтын.
«Декоративно-прикладной творчествыште эн сай династий» номинацийыште I степенян лауреат лӱмым «Савак кундем» калык фольклор ансамбль (Марий Турек район Сысоево тӱвыра пӧрт) сеҥен налын.
«Эн сай «Детки и предки» фотовыставке» номинацийыште I степенян дипломым «Дары предков» усталык группылан (Советский поселкысо каныме рӱдер) кучыктеныт.
«Эн сай национальный кухньо» номинацийыште уэш «Кыстын Вачи тукым» ойыртемалтын.
Л.КАМАЛЕТДИНОВА.
